SUENA ASTURIES

CHARLA-COLOQUIU ENTAMÁU POL GRUPU D’OPINIÓN ALGAMAR

SUENA ASTURIES

LA MÚSICA N’ASTURIES GÜEI

Martes, 19 de febreru del 2008. Casa la Cultura de La Pola.

Al actu d’Algamar sobre la música n’Asturies asistieron setenta y picu persones y principió cola proyeición del documental “Sueña’l camín”, realizáu por alumnos del institutu Aniceto Sela de La Pola L.lena baxo’l nome de producciones L.luna L.lena, y nel que s’entrevista a varies persones del panorama musical asturianu.

Darréu Isaz Vallina Arboleya, componente d’Algamar y del grupu folclóricu y d’investigación El Ventolín, presentó a los cuatro participantes y dio-yos la pallabra pa que pintaren brevemente la so esperiencia sobre’l tema.

Anabel Santiago lo primero de too allugó hestóricamente la tonada, afirmando que’l xenéru ta documentáu d’hai poco más de sieglu y mediu. Pue definísela como cantu llibre ad libitum, y pue acompañase d’instrumentos como la gaita o’l panderu. Les denominaciones usaes nel sieglu XIX yeren tonada de la tierra y tonada arriera; el términu usáu fuera de les fronteres d’Asturies foi tonada asturiana; y cuando se fixo culta y hebo autores que componíen espardióse’l nome d’asturianada. Abordó entós el tema del purismu y cómo cantantes como El Presi o La Pastorina foron de los más nomaos pero tamién de los más criticaos polos consideraos puristes; Anabel ye de la opinión de que la pureza nun ta reñía col mestizaxe, y qu’esi procesu ye necesariu pa da-y a la tonada una trescendencia universal. Nesti sen, gallegos, andaluces y aragoneses yá fixeron esi llabor, como exemplu comentó que si daquién quier oyer cante jondo pue dir a les cueves del Sacromonte, pero tamién esiste’l grupu Ketama y otra montonera de xente reinterpretando la tradición. N’Asturies esi llabor ta tovía pendiente y hai bien de prexuicios que tan torgando que se faiga. Pa describir el panorama actual recurrió a la propia esperiencia: con trece años yá participaba en concursos y, teniendo pasao catorce años, el repertoriu d’esos concursos sigue siendo’l mesmu. Afirmó que la repetición mata la creatividá; que por eso nun ñacen tonaes nueves; y que’l futuru ta en cambiar esa mentalidá. Mencionó xente que ta trabayando nello, como los hermanos Valle Rosa, Héctor Braga, Mª Luz Cristóbal Caunedo... Tamién mencionó un par de concursos nos qu’hai una seición pa tonada d’autor, iniciativa qu’aplaude.

Chus Pedro comentó lo prestoso de ver xente mozo participando nel videu acabante proyeutar. En comparanza pue dicise qu’elli vien de les catacumbes: Camaretá ye un coleutivu de persones qu’arrincó nos setenta; nel 78 surde Nuberu como marca nel sentíu discográficu; pero Nuberu ye más qu’una persona que canta y otra que toca la guitarra, Nuberu ye un sentimientu, que ñaz na conca’l Nalón baxo’l paragües de la esquierda, del movimientu cristianu y del partíu comunista. Nuberu lleva trenta años cantando nuna llingua que nun esiste; porque la clas política s’empeñó en torgamos la llingua; pero magar nun esista oficialmente sí pa un sector significativu de la sociedá. Pa Chus Pedro la música foi fundamental na difusión del asturianu. Fixo alcordanza del primer discu: “Asturies, ayeri y güei”, un cantu a la solidaridá y al trabayu, que nel añu 1978 vendió 48.000 discos; güei les coses cambiaron abondo, eses cifres son imposibles. Na ñacencia de Nuberu hai trés partes: compromisu coles llibertaes, compromisu cola llingua, y compromisu cola música tradicional nun llinguaxe más universal, contemporaneu. Dase nel grupu eso tan de moda agora de fusión ente la tradición y la modernidá; tocáronse tolos palos: un discu acústicu, otru de rock sinfónicu, un terceru de pop... Pensando en presente comenta que-y presta la compaña na mesa, porque la vida ye una carrera de relevos y, dempués de trenta años de tirar pola mula torda, el Nuberu va volver pa Exiptu, por segunda vez. Fai alcordanza de la ufierta mui tentadora económicamente d’Hispavox nos años 80 pa dexar de cantar n’asturianu, pero ta seguru de que nun diba ser más feliz de lo que ye agora y l’alma en cuenta vendela al diañu vendióla a Asturies.

Xune quixo plantegar básicamente dos custiones: per un llau la situación de la xente músico profesionalmente falando, nesti aspeutu pon l’exemplu de Dixebra, onde hai un profesor de matemátiques, un bancariu, un rexistrador de la propiedá y dalgún músicu profesional, pero non con Dixebra, sinón como profesor de conservatoriu, etc.; y per otru llau un tema fundamental, el desconocimientu por parte del públicu de la música que se fai n’Asturies. Y esto ye frutu del desdexu de l’Alministración, nun se creó un circuitu de la música, hai obsesión por construyir infraestructures, pero nun se-yos da conteníu. A Xune paez-y qu’ehí ye onde se ta fallando dafechu. En trenta años de gobiernu autonómicu nun se notaron eses infraestructures qu’elli llama intanxibles y que teníen que dar sentíu a les otres infraestructures. Si s’entruga la causa última d’esa situación, la respuesta ye que nun hai una autonomía comunicativa realmente n’Asturies: nes emisores radiofóniques (sacante Radio Sele y dalgunes emisores llocales) nun hai una programación n’asturianu; cualquiera de les grandes emisores d’Asturies ponen la mesma música qu’en Cádiz, en Segovia o en Valladolid; y esa música ye la de grupos con una compaña potente y con dineru; porque, aclara, los númberos ún, páguense. N’otres comunidaes esa carencia iguóse con medios públicos. Faló entós de la Radiotelevisión d’Asturies (qu’elli prefier llamar asina en cuenta de Radiotelevisión del Principáu d’Asturies) na que collabora: el primer direutor, Javier Araújo, tenía interés en que se punxere música asturiana, incluso punxo un porcentaxe, el 30 %; pero entró otru responsable y revocó esa decisión, agora ponse música asturiana los sábados y los domingos pela tarde, pero música contina, ensin presentar el cantar nin el grupu, pela selmana solo hai presencia nel programa d’Ismael Arias y daqué que pon el propiu Xune. Tou esti panorama esplica esi desconocimientu del que se falaba por parte del públicu. En cuantes a la evolución de la música asturiana, Xune aclara primero que pa elli música asturiana nun ye solo la que vien de la tradición, ye toa aquella cantada n’asturianu, porque l’usu de la llingua asturianiza cualquier estilu musical; tamos asistiendo a un cambéu estéticu, cuando entamaba Chus Pedro, el paquete yera nacionalismu, llingua y música celta, agora yá nun va necesariamente xunto, pues ser nacionalista y gustate’l punk. Hai una mocedá de barriu que yá nun ta conectao colo rural; son neofalantes, y eso tien coses bones y males, tienen les zunes de los neofalantes, pero eso pasó en tolos sitios, ye dalgo que va dir puliéndose; ellos son los que van posibilitar que l’asturianu se “modernice”, entendiendo esti términu de manera rellativa, porque tan moderno ye la tonada d’Anabel Santiago, podría meyor falase de música “actual”.

Nacho Fonseca valora’l videu como mui clarificador. Confiesa que nos sos empiezos na música había una motivación de recuperación cultural y llingüística. El proyeutu de trabayu colos guah.es que foi’l grupu Seliquín ñaz en Porrúa nel añu 86, daquella arrincaba l’asignatura d’asturianu nes escueles, solo mui poco antes unos cuantos centros pilotu aniciaron la esperiencia. Había 17 rapacinos nel grupu, de los que 15 participaron nuna muestra nel teatru Campuamor, como piesllu del actu institucional de l’Academia de la Llingua nel Día de les Lletres Asturianes; el treslláu fíxose en dos taxis y el propiu coche del mayestru; nel actu taba’l presidente del Principáu nesa dómina, Pedro de Silva, al que-y gustó l’actuación; d’ehí surdió la oportunidá de grabar un discu, lo que yera daqué increyible pa ellos. Nacho nun pierde la perspeutiva de que l’oxetivu yera aportar un granu d’arena a la escolarización del asturianu; la so formación musical ye autodidacta y limitada. La xera siguió en Lieres con Xentiquina, que ta a puntu cumplir venti años. El grupu nun tien escesivos problemes pa les sos actuaciones, solicítaselos bien d’ello ensin faer muncha propaganda; fechu qu’elli atribúi a que l’actividá presta y al ser con rapazos la llingua asturiana nun produz rocea. Anuncia un discu pa zarrar venti años, porque al xubilase en cuatro años nun cunta con cumplir venticinco col grupu. Como los guah.es siempre tienen ocho años y el mayestru non, hai ciertu desgaste inevitable, y d’ehí vinieron les ganes de faer otres coses, como’l so llabor de compositor pa los discos de la so fía, Esther Fonseca. Abúlta-y que la xente que fai música ye la parte de la cultura asturiana con más fuercia, más viva y con mayor proyeición; nuna comunidá con hacia un millón d’habitantes hai una gran producción; el problema ye que la clas política nun valora que la llingua ye’l fechu cultural más importante que pue haber nuna sociedá; andúvose dando “carambelinos”, pero nun se punxo verdaderamente en valor esi patrimoniu tan importante. Ye absurdo pidir una gran demanda social, en Galicia tampoco se cortaron autopistes pa pidir la oficialidá y, a diferencia d’equí, ellí’l gallegu ta xugando un papel dinamizador fundamental. P’acabu Nacho fala de la tremenda dificultá de sacar un discu; nel casu de “Viaxe” elli decidióse pola autoproducción, lo que supón arriesgar perres propies, con una pequeña ayuda del Principáu. El trabayu con un productor ye complicáu, porque tienes que xugar col gustu d’ésti y nun tien por qué coincidir col tuyu.

Abrióse entós l’alderique a la intervención del públicu, abordando dalgún de los problemes de la música n’Asturies nesti sieglu XXI. Falando de les nueves tecnoloxíes na difusión de la música, Chus Pedro entruga a Xune, como direutor del Anuariu de la Música n’Asturies, cuántos discos salen al añu y ésti cita de memoria unos 42 nel añu 2006 y 35 nel 2007, de música n’asturianu o tradicional; Chus Pedro argumenta entós que llamar empreses a les discográfiques asturianes ye rellativo, en realidá dedíquense más bien a la filantropía, recuerda que nel añu 78 Nuberu vendió 48.000 discos, frente a 5.000 del últimu, la situación actual, en competencia con internet, col de la mochila, ye complicada. Anabel, como persona moza, ve’l futuru na dixitalización, cita datos que falen d’una cayida del 25 % de les ventes en tol Estáu nel últimu añu, pero un aumentu del 32’1 % nes descargues. Xune tampoco ta escontra l’emule, Dixebra seique vaya a Cerdeña a tocar esti branu gracies a qu’agora la música pue oyese en cualquier parte del mundiu; el problema ye de les multinacionales, acábase-yos el comederu y saquen un discursu de pérdiga, cuando en realidá hai que falar de mengua de beneficios, ye un discursu catastrofista pa poder faer reconversión pura; per otru llau opina que’l CD nun va desapaecer como tal soporte físicu, pero va convertise nun elementu más de promoción del grupu, una especie de carta de presentación, agora ta usándose como regalu de calidá d’empreses; poniéndose nel papel de productor, les productores van tener qu’adaptase a los cambeos. Chus Pedro menciona como tendencia actual la voluntá de xestión integral del artista por parte de les multinacionales; nuna dómina en que la tecnoloxía permite mercar un cantar por 0’98 €, n’Asturies tamos en pañales, sáquense munchos discos, pero por puru voluntarismu. Referente a les multinacionales del sector (hacia unes seis grandes firmes) Xune diz que tán en reconversión, dexen de tener tantos beneficios no que llamen la “división musical”, pero la mesma empresa produz n’otros sectores económicos; pa elli tienen un discursu hipócrita, puxaron pa cobrar un canon dixital por culpa la piratería y per otru llau son eses mesmes empreses les que vienden los aparatos colos que se piratia.

Énte una entruga del públicu sobre l’altor de la música en Siero, Nacho fala de qu’hai un gotu de “xovinismu” en La Pola, arguyosa de ser capital d’asturianía y de que ye’l conceyu que meyor canta d’Asturies; elli piensa que son lleendes cariñoses, d’autoapreciu, qu’en La Pola hai bona salú musical, col iconu d’Ángel Embil como centru d’un llabor qu’abarca a más xente, pero non superior a otros munchos conceyos, onde tamién se fai bona música; na so esperiencia col discu “Viaxe” cuntó con nada menos qu’ocho músicos de Siero; aprovechó tamién pa criticar la tardanza d’una infraestructura tan necesaria y demandada como l’auditoriu de La Pola.

Entrugaos pola perceición de músicos cantando n’asturianu fuera les fronteres d’Asturies, Xune comenta anécdotes de Catalunya: el so conciertu nel festival de Vic foi tresmitíu en direuto por Radio Quatre porque llamó l’atención un grupu de rock, con gaita y cantando n’asturianu; nuna entrevista na radio pidióse-yos que respondieren n’asturianu; n’otros sitios, al llau de músicos que canten en moldavo, l’asturianu nun se ve tan exóticu; sobre’l tipu de públicu qu’acude Xune contesta chanciosamente que los que ve na primer filera de los conciertos nun los dexaría salir cola fía. Chus Pedro recuerda un conciertu fuera d’Asturies onde dixo n’inglés que la música yera un llinguaxe international y recibió una gran ovación; pa elli trátase d’un problema ideolóxicu, non llingüísticu. Pela so parte Anabel recordó un conciertu nel Xovellanos con unes cien persones y otru en Castelló, onde cantó y presentó n’asturianu nun teatru con capacidá pa mil quinientes persones, con entrada de pagu, y llenu; tamién una anécdota de tar presentándose en francés y sentir dende’l públicu: “canta Chalaneru”.

Tamién se preguntó dende’l públicu pola música nel cine; Anabel cuntó que precisamente taba acabante grabar con Varillas la banda sonora d’una película de Quirós, obra de Ramón Prada. Hai una presencia de la tonada, porque la muyer del protagonista, un ecoloxista lluchando escontra la lluvia acedo, ye ella y canta tonada.

La pregunta de considerar cambiar de llicencia y nun se suxetar a la Sociedá Xeneral d’Autores contestóla Xune confesando les sos contradicciones; Dixebra son socios dende’l segundu discu, agora mesmo nueve sonlo, anque dalgunos tienen dos apercibimientos: ún por firmar un manifiestu pa constituyir la sociedá vasca d’autores; y el segundu por participar gratuitamente nun conciertu a favor de la Coordinadora Asturiana pola Insumisión; al tercer apercibimientu échenlos; reconoz que cuntar esto ye un poco d’autoxustificación, pero l’asuntu nun ye cenciellu, elli, como productor comenta a los grupos si quieren pagar a autores, munchos arrenieguen, pero tienen de saber que si nun s’asocien, en pasando venticuatro meses, la SXAE quédase colo que la productora ta obligada a pagar por esi conceutu; de toes maneres tán plantegándose lo de Creative Commons.

TOLERANCIA EN CASA

Dende’l grupu d’opinión ALGAMAR siempre tamos dispuestos/es al diálogu y al discutiniu; anque delles veces les postures enrocaes faen que les conversaciones se conviertan en diálogos de besugos o de sordos. Normalmente ye inútil el discutiniu sobre la llingua asturiana con Javier Fernández. Pero nes declaraciones que fexo esti día soltó una fras contundente que mos prestó. Nós, como la inmensa mayoría de les persones, nun podemos menos que tar d’alcuerdu con que “los raigaños de la intolerancia afinquen na sobrevaloración de lo propio”.

Claro que les coses nun son tan inocentes como paecen y igual merez un pequeñu análisis. Lo primero de too hai que dicir que los mensaxes tienen un contestu y la so comprendoria camuda dependiendo d’esti. Nun ye lo mesmo dicir la mesma fras a los banqueros de Wal Street qu’a los inmigrantes de les pateres. L’afirmación ta fecha falando de la llingua asturiana y nun congresu de les Mocedaes Socialistes. ¿Ye un tirón d’oreyes a esta organización pola so defensa de la oficialidá de la llingua asturiana? ¿Faise entós dende la “tolerancia” de la dirixencia socialista a les bases? Per equí podríamos siguir, pero solo queremos entrugar una cosa ¿les altes instancies d’un partíu tienen de proclamar doctrina o recoyer sensibilidaes y respetar la pluralidá de les bases?

Un contestu más ampliu allúgamos nel debate sobre la reforma del estatutu asturianu. Tala reforma ta inxerta nun procesu aniciáu n’otres comunidaes autónomes y propiciáu por Zapatero, nun apueste ideolóxicu determináu: dende una opción política respetuosa, tolerante y abierta preténdese llegar a consensuar testos llexislativos que recueyan la pluralidá social, cultural y nacional del Estáu. Ello nun se fai ensin discutiniu, pero a la fin llegóse a un ampliu consensu en Valencia, a una mayor implicación del socialismu en Catalunya, a reformes unánimes n’otros sitios... Solo la cúpula de la FSA paez siguir encerriscada en defender un modelu d’estatutu que contradiz les directrices d’ampliu consensu democráticu ensayaes per uquiera nel so partíu.

Podría pensase que’l contestu social asturianu tien dalgo específico. Pero les encuestes sociolóxiques dan un porcentaxe mayoritariu d’asturianos (60 %, vid. Llera Ramo, Estudiu sociollingüísticu d’Asturies, 2003) que tán a favor de la oficialidá. Teniendo en cuenta la distribución de votos, a lo menos una minoría de los dirixentes y una mayoría de los votantes del PSOE n’Asturies tán a favor, porque la encuesta ta fecha n’Asturies y equí la xente vota lo que vota. Nun paez entós que la crítica tea basada nuna adaptación al sentir mayoritariu de la sociedá asturiana, nin siquier a la sensibilidá mayoritaria del electoráu socialista asturianu.

Entrando nel nivel de les motivaciones personales, la observación tendría’l so máximu valir si formare parte d’un exerciciu d’autocrítica. Que sepiamos la llingua d’espresión del señor Fernández ye’l castellán, entós ta falando d’una crítica a otros que faen un actu d’intolerancia sobrevalorando l’asturianu. Equí ye onde mos perdemos y la fras dexa de ser aclaratoria. ¿Quier dicer el señor Fernández que pidir la oficialidá ye sobrevalorar una llingua? Nel Estáu español son oficiales el gallegu en Galicia, el vascu n’Euskadi y en Nafarroa, el catalán en Catalunya y Baleares, en Valencia col nome de valencianu, l’aranés nel so valle, el castellán en tolos llaos. ¿Piensa’l señor Fernández que sobrevaloramos la llingua por pidir el mesmu tratu? ¿Por qué’l Partíu Socialista defende en toes eses comunidaes la llingua autóctona y equí non? ¿Oficializar el gallegu y el catalán nun ye sobrevalorar, pero sedríalo faer lo mesmo col asturianu? La lóxica de l’afirmación esfaraguya contestualizando. D’un filósofu quiciabes pudiéremos almitir orientaciones xenériques, nun políticu los fechos y el contestu ye clave.

Per otru llau, ye importante conocer los oríxenes; pero tamién ye clave tener en cuenta les consecuencies: la intolerancia tien como efeutu la discriminación; una persona intolerante piensa que los demás nun tienen por qué gociar de les mesmes prerrogatives qu’ella, que ser diferente supón nun ser iguales en cuantes a drechos. Si se falare d’un asuntu propiu pue entendese la prudencia del señor Fernández en nun sobrevaloralo y podría pensase incluso n’arrenunciar a ciertos drechos. La custión ye que’l señor Fernández nun ye usuariu del asturinau solo fala castellán, a lo menos públicamente, cuando falamos d’oficialidá tamos nesi ámbitu públicu, lo que caún fale en casa ye asuntu de la sociollingüística non de la llei. Entós el señor Fernández ta acusando de sobrevaloración a los asturfalantes y que “toleremos” que la nuesa llingua siga arrequexada nel ambiente familiar y nun s’use con normalidá públicamente. Pero elli sí pue usar en tolos niveles públicos la suya (tamién nuesa): el castellán. ¿Nun tenemos entós los mesmos drechos qu’elli? ¿Intolerancia?


Dempués el señor Fernández fai una trampuca: nun quier la oficialidá, pero sí defender la llingua: “preservar la llingua asturiana ta bien, pero glorificala non”. Tamos d’alcuerdu: dexen de dicir que quieren muncho al asturianu, dexe’l presidente Areces de proclamar que la fala en casa, dexen de lleer poemes nel parllamentu, dexen de subvencionar “el requexu del bable” en periódicos y radios; en vez d’eso recueyan nel estatutu la oficialidá y desarrollen llexislativamente esi drechu d’una parte de la sociedá asturiana. Pero tanto querer “preservar” la llingua y nin siquiera son quien a respetar la Llei d’usu actual... la so tolerancia nun llega a almitir qu’un trabayador del Principáu pida les vacaciones o un permisu pa operase n’asturianu, tampoco pa qu’una emisora de radio en llingua asturiana disfrute de la llicencia comercial que-y correspuende, o pa que se puedan lleer tesis n’asturianu na Universidá, nin pa qu’un rapaz amazcaráu de pita pueda pidir respetu pal asturianu con una pancarta ensin que lu detengan, nin pa qu’haya una programación digna na llingua’l país na “so” tele... ¿En qué quedamos podemos usar la llingua como instrumentu de comunicación o non? ¿O “preservar” quier dicir grabar un monólogu nun CD y guardalu nun muséu más de cartón-piedra?

Supongo que nesa mesma llinia convencerán al gobiernu d’España pa que tranque l’institutu Cervantes, se dexe de falar del español como instrumentu de cultura y se suspendan les campañes y la gran cantidá de dineru pa promocionalu. Si los preseos de comunicación nun precisen glorificase ¿pa qué meter perres nello? (más de 89 millones d’euros pal 2007). Nel 2005 dióse-y el Premiu Príncipe d’Asturies de comunicación y humanidaes, xunto cola Alianza Francesa, la sociedá Dante Alighieri, el British Council, el Institutu Camoes y el Goethe-Institut, toes elles instituciones que promocionen llingües como instrumentos de cultura. Sedrá que l’asturianu ye la única llingua del mundiu condergada a solo ser “instrumento de comunicación”? Y oxalá fore asina, pero quieren que sía instrumentu de comunicación solo en casa, onde nun mos tengan qu’aguantar, yá viemos cómo acaben los intentos d’usar l’asturianu n’ámbitos públicos.

Pero Fernández pasa percima del aspeutu cultural, elli va direutamente a lo que-y duel: instumentu ideolóxicu. Suponemos que nun quier dicir que tolos paisanos y paisanes de los pueblos d’Asturies solo por falar asturianu sían separatistes; tampoco l’altu porcentaxe de militantes del partíu socialista que la usen a diario. Elli refierse a los que “manipulamos” l’usu de la llingua pidiendo la oficialidá, claro. Eso sí ye profilaxis política, di que sí, qu’empieces dando un drechu y van acabar por querer cambiar les élites polítiques... Ye igual qu’haya xente asturiano de tolos colores políticos reclamando coherencia pa cola defensa del asturianu, la cosa ye desaniciar a esi grupín de separatistes. La más elemental etiqueta democrática debiera concluyir que la opción nacionalista n’Asturies ye tan digna como les demás y onde se tien que xugar la so viabilidá ye nes eleiciones. Pero non, hai que cortalo pela freba. Y tenga cuidáu’l señor Fernández cola montonera gaiteros, que póneste a tocar la gaita en vez de la guitarra y cualquier día pienses qu’esto nun ye España.

Nun somos a calletrar qu’una sociedá que tien varies llingües sía más tolerante si solo reconoz oficialmente a una que si les reconoz a toes. Y si tamos d’alcuerdu en que la sobrevaloración de lo propio pue llevar a la intolerancia; tampoco hai qu’escaecer que la inorancia de la propia realidá trai la falta de respetu pola de los demás. Nun mos paez qu’una persona que nun-y gusta la pluralidá de la sociedá na que vive vaya a ser quien a respetar la pluralidá del mundiu. Nós nun llegamos a ser cosmopolites, tamos más bien pola aldea global, porque sí mos considermos internacionalistes, de los internacionalistes a los que-yos gusta la variedá cultural, llingüística, musical y hasta gastronómica d’esti planeta, non de los que querríen una sociedá y un mundiu uniforme, con una forma de pensar y una sola llingua, por supuesto la d’ellos. Nun somos d’esos ciudadanos del mundiu que quieren dir a tolos llaos y sintise como en casa, queremos dir a tolos llaos y sentimos como en casa d’un hermanu; somos hermanos nun queremos ser clones; queremos entendemos y compartir ilusiones con toles persones del planeta, non solo comunicamos porque ellos falen español. Abúltamos que’l señor Fernández tovía nun ta al tanto de les actualizaciones del diccionariu d’español, l’acepción hasta agora de cosmopolita ye: “1. adj. Dicho de una persona: Que considera todos los lugares del mundo como patria suya”, pero l’avance de la vixésimatercera edición diz: “1. adj. Dicho de una persona: Que se ha movido o se mueve por muchos países y se muestra abierto a sus culturas y costumbres”. Porque efeutivamente, pa nós les llingües nun son solo un mediu de comunicación, queremos entendemos, non solo comunicamos. Como somos los primeros en falar, respetar y pidir respetu pa la nuesa llingua paezmos que vamos ser a entender meyor que n’otres partes del mundiu o nesta Asturies de toos/es se pida tamién respetu pa la cultura y les llingües que van llegando pa enriquecela. ¿O pue respetase lo d’otros odiando lo qu’ún tien en casa?

En fin señor Fernández que la fras prestómos, asina, fuera contestu, pero rara vez les altes xerarquíes dende posiciones de fuercia dan lleiciones de tolerancia, y menos si la fin (non solo de los sos discursos sinón de les sos obres) ye nun respetar a minoríes. Nós naguamos por una Asturies plural, onde ser asturianu/a sía trabayar y vivir n’Asturies, onde los/es inmigrantes s’integren, onde los/es emigrantes mozos/ces nun tengan que colar, onde les opciones polítiques asuman el discursu de les minoríes, onde les lleis respeten los drechos de muyeres, homosexuales, paraos, mocedá... Queremos un estatutu onde quepamos toos. Usté va vese reflexáu nelli, de xuru. Los/es asturfalantes ¿nun cabemos?