La reforma del estatutu d’autonomía d’Asturies ye inminente. Poles declaraciones de dalgunos representantes políticos paez qu’esti ye un tema poco importante, sobreveníu y qu’hai que quitar del medio; que nun tien interés pa la sociedá nin pa ellos. Abúltamos que se va intentar despachalo aína, ensin abrir un debate social y ensin enfrentase a toles implicaciones que tien.
L’estatutu yá cumplió ventiséis años y sufrió delles reformes. Pero nel contestu políticu actual esta reforma nun tien traza de ser una más, con dellos retoques téunicos. Pue resultar d’ella la redaición d’una norma llegal que va marcar pa munchu tiempu la definición y organización d’Asturies como comunidá, los nuesos drechos y obligaciones, el tipu de rellación con otres comunidaes y col Estáu. Los partíos políticos mayoritarios decidieron nel so día una vía lenta pal procesu autonómicu, y vieno transitándose per un camín con participación social escasa, asunción de competencies ruina y un papel subsidiariu de les decisiones asturianes en rellación colos intereses del Estáu.
L’estatutu d’autonomía ye por definición la norma institucional básica d’Asturies, la constitución asturiana, la llei de lleis, y por eso tien que reflexar lo qu’Asturies ye y representa, la so identidá como país, la so llingua, la so cultura. A les persones que vivimos n’Asturies va afectamos lo que s’apruebe, ye un marcu que va condicionar la nuesa realidá cotidiana. Otres normes europees o la constitución española recueyen drechos individuales y coleutivos, pero ye nel estatutu onde les circunstancies concretes d’asturianos y asturianes tienen que se reflexar, pa poder entamar proyeutos qu’ameyoren les nueses condiciones de vida.
Paezmos que la sociedá civil tien qu’asumir un papel protagonista nesti procesu. Namás asina vamos sentir l’estatutu como daqué nueso, onde tán recoyíes les tendencies per onde tien de caminar la sociedá asturiana del sieglu XXI. Namás si se consigue que la xente participe na ellaboración y se saca de los círculos téunicos o políticos podemos consiguir que l’estatutu se convierta nun preséu con trescendencia social.
Dende’l grupu d’opinión Algamar nun queremos que se mos furtie, una vez más, el nuesu drechu a participar y a vemos reflexaos na nuesa llei cimera y, polo tanto, esponemos públicamente dos plantegamientos xenéricos fundamentales y básicos que, pa nós, dan sentíu y razón a un estatutu dignu p’Asturies.
De mano tien que ser un estatutu p’Asturies. Paez una obviedá, pero nun queremos un modelu menor aplicáu a toles entidaes ensin pesu políticu; y equí los llexisladores van tener que trabayar en cuenta copiar modelos probetayos que nun cubren les nueses necesidaes. Tien que se recoyer la realidá nacional d’Asturies, la oficialidá de la llingua asturiana, aquelles instituciones hestóriques del pueblu asturianu que sirvan p’anguaño, el drechu consuetudinariu, la organización y la participación de Conceyos y parroquies, l’asunción de los niveles máximos d’autogobiernu o una financiación acordies.
Nun pue perdese la oportunidá de que los nuesos drechos individuales y coleutivos tean recoyíos nesta norma de normes. Malamente la política que se programe los va tener en cuenta si nun apaecen nesta llei fundamental. Había qu’especificar y establecer les condiciones pa que se pudiere trabayar daveres por algamar una montonera drechos, como tolos qu’afeuten al mundiu llaboral; a que toles persones tengan los mesmos drechos ensin discriminación de xéneru o opción sexual; drechu a una vivienda en condiciones; a una muerte digna; a un mediu ambiente conserváu llibre de la especulación privada y pública; a que los llabradores y los ganaderos vivan dignamente nel campu; a una educación y una sanidá públiques de calidá; a qu’a les persones mayores les instituciones públiques-yos garanticen unes condiciones de vida bones; a vivir con normalidá en cualquiera de les llingües propies d’Asturies; a tener oportunidaes de trabayu y d’integración n’Asturies pa la xente de fuera; al retornu de los emigrantes y descendientes que tuvieron que marchar y a la participación de los que siguen fuera; a una alministración al serviciu de les persones; a que les aportaciones de les organizaciones sociales se tengan en cuenta necesariamente nes decisiones polítiques.
Nel grupu d’opinión Algamar pensamos que tolo recoyío nun son más que dalgunos de los mínimos irrenunciables pa que los asturianos y asturianes tengamos la opción de construyir un proyeutu de futuru más viable, más xustu y tamién más solidariu.
Agora, la custión ye si vamos facer un estatutu nel que teamos toes y toos o van ponemos ún que nun sintamos como propiu.
Grupu d’Opinión ALGAMAR
