Algamar Asturies

El Ferreiro

2010-02-10T02:42:00.004+01:00

El Grupu d’Opinión ALGAMAR sumamos la nuesa voz a les múltiples quexes pola inxusticia cometida escontra Pepe El Ferreiro. La so destitución considerámosla un ataque a los procedimientos democráticos y a la cultura patrimonial del Navia-Eo.

Talamente paez qu’ente tantu muséu de cartón-piedra a los responsables políticos de la Conseyería de Cultura nun-yos cuadraba’l llabor d’una persona que durante munchísimos años foi atropando y dignificando el padremuñu cultural de la so zona.

Les disculpes son de lo más estrafalario, pero les razones son evidentes: imponer la so voluntá, reprimir la disidencia crítica y dexar claro que los museos y l’actividá cultural nun ha valir pa caltener y potenciar la cultura propia.

Seique pensaren que diba ser otru casu más de deu mandón, que yá naide-yos retruca. Pero esta vez nun vamos callar.

Grupu d’Opinión ALGAMAR

Europees 2009

2009-06-08T02:03:00.003+02:00

Resultaos de les candidatures asturianes nes europees 2009 por comunidaes

		AA	%	UNA	%
COMUNIDÁ

Andalucía		207	0,01	281	0,01
Aragon		41	0,01	43	0,01
Asturies		766	0,18	846	0,20
Canarias		101	0,02	101	0,02
Cantabria		46	0,02	24	0,01
Castilla-La Mancha		48	0,01	65	0,01
Castilla y León		119	0,01	121	0,01
Catalunya		258	0,01	355	0,02
Ceuta		3	0,02	1	0,01
C. Valenciana		168	0,01	217	0,01
Euskadi		69	0,01	382	0,05
Extremadura		25	0,01	37	0,01
Galicia		107	0,01	115	0,01
Illes Balears		41	0,02	51	0,02
La Rioja		9	0,01	9	0,01
Madrid		152	0,01	477	0,02
Melilla		4	0,02	2	0,01
Murcia		29	0,01	35	0,01
Navarra		28	0,01	112	0,06

	TOTAL	2221		3274

	Definitivos	2199		3296

Drechos humanos en Colombia

2008-11-10T23:27:00.003+01:00

Presentación del informe de la cuarta visita d’una delegación asturiana pa pescudar los drechos humanos en colombia

Martes, 11 de Payares, 20:00
Salón d’actos de La Casa La Cultura de La Pola Siero

PARTICIPEN:

- Javier Orozco Peñaranda, coordinador del Programa Asturianu de Drechos Humanos

- Rafael Palacios García, componente del grupu parllamentariu Ix-Ba-Verdes

CONVOQUEN:

- Grupu d’Opinión Algamar
- Soldepaz Pachakuti

Manifestación pola Oficialidá. Sábadu 4 d’ochobre.

2008-09-12T01:12:00.001+02:00

Entamará na Estación del Norte d’Uviéu a les seis de la tarde del prósimu sábadu cuatro d’ochobre.

Asturies Incomparable

2008-07-18T04:04:00.004+02:00

Llistáu de drechos garantizaos nel restu los estatutos	C A S T . y L L I Ó N	B A L E A R E S	A N D A L U C Í A	C A T A L U Ñ A	A R A G Ó N	V A L E N C I A	A S T U R I E S
A la gratuidá de la ensiñanza nos niveles obligatorios y n’aquellos otros que la llei determine	SÍ	SÍ	SÍ	SÍ			NON
A que les persones con necesidaes especiales reciban apoyu educativu	SÍ	SÍ	SÍ				NON
A la ensiñanza llaica nos centros públicos			SÍ	SÍ			NON
A la gratuidá de los llibros de testu na ensiñanza obligatoria nos centros sosteníos con fondos públicos			SÍ				NON
A un sistema sanitariu públicu con caráuter universal		SÍ	SÍ		SÍ		NON
A la gratuidá del sistema sanitariu				SÍ			NON
A regulación de plazos p’aplicar un tratamientu (supresión de llistes d’espera)	SÍ	SÍ	SÍ				NON
A tener una segunda opinión médica	SÍ		SÍ				NON
Al consentimientu informáu sobre los tratamientos médicos	SÍ	SÍ	SÍ	SÍ	SÍ		NON
A recibir tratamientos y cuidaos paliativos	SÍ	SÍ	SÍ	SÍ			NON
A anticipar la voluntá sobre los tratamientos médicos (testamentu vital)	SÍ	SÍ	SÍ	SÍ	SÍ		NON
A una renta garantizada de ciudadanía (salariu social)	SÍ	SÍ	SÍ	SÍ	SÍ		NON
Al usu, ensiñanza y proteición de la llingua de signos	SÍ	SÍ				SÍ	NON
Prohibición de cualquier discriminación por sexu o orientación sexual (prohibición de la discriminación salarial)	SÍ	SÍ	SÍ	SÍ		SÍ	NON
A la proteición escontra la violencia, sobre manera la machista	SÍ		SÍ			SÍ	NON
D’accesu a una vivienda digna		SÍ	SÍ	SÍ		SÍ	NON
A la inscripción nun rexistru públicu de les pareyes non casaes y a la igualdá coles casaes			SÍ				NON
De la ciudadanía a presentar iniciatives llexislatives	SÍ	SÍ	SÍ	SÍ	SÍ		NON
De la ciudadanía a promover la convocatoria de consultes populares	SÍ	SÍ	SÍ				NON
A dirixir pidimientos y formular quexes a les instituciones y alministraciones públiques	SÍ	SÍ	SÍ	SÍ	SÍ		NON
A la proteición de los datos personales que figuren en ficheros de l’alministración	SÍ	SÍ	SÍ	SÍ	SÍ		NON
A tar protexíos escontra les distitntes formes de contaminación				SÍ	SÍ		NON
D’accesu a les nueves tecnoloxíes			SÍ			SÍ	NON
A la concertación social y a la participación institucional de los axentes sociales			SÍ	SÍ			NON

Filoloxía

2008-06-27T15:49:00.004+02:00

El Grupu d’Opinión ALGAMAR queremos espresar la nuesa esmolición y la más fonda indignación pola decisión de la Xunta de la Facultá de Filoloxía de nun incluyir l’asturianu como asignatura nos sos nuevos títulos de grau.

Aprovechamos pa mandar un mensaxe de sofitu a la señora Ana Cano y el so equipu de gobiernu que, nuna actitú coherente por demás, antepunxo los sos principios a los sos intereses personales y presentaron la so dimisión.

Félix Fernández de Castro

La xente asturiano nun tenemos otru remediu que lluchar con toles fuercies pa consiguir drechos de lo más elemental. La xera de consiguir la reconocencia de llingua oficial pal asturianu, daqué aceptao por consensu n’otros munchos sitios, ye equí negao foscamente. Colos mentirosos “argumentos” de la non imposición tórgasemos l’usu normal a los que queremos falar y escribir l’asturianu en toles situaciones de la vida.

Pero agora dase un pasu más na represión. Dellos “enseñantes” que quieren sacamos de l’aldea y de l’asturianía, anque sía a la fuercia, quítenmos de poder estudiar la nuesa llingua na Facultá de Filoloxía de la Universidá d’Uviéu. La Universidá desdexa d’esta miente’l so deber formativu p’asumir un papel tarazador de la nuesa cultura.

Sicasí la sociedá asturiana ye abondo respetuosa, plural y abierta, pero dellos sectores universitarios xúnense agora a determinaes cúpules polítiques pa convertise en parte fundamental de los problemes d’Asturies, dexándose llevar polos sos enclinos más retrógrados y diendo a la escontra del sentir mayoritariu, que nun ven l’asturianu un problema sinón como dalgo nueso, de lo que mos sentimos arguyosos. Solo la contestación social y la movilización mos pue llibrar del fanatismu antiasturianu. Y n’ALGAMAR vamos siguir nesa xera y pidimos responsabilidá al asturianismu pa que sepia tar al altor de les circunstancies dando una respuesta unitaria.

La (nuesa) Revolución de Mayu

2008-05-26T09:47:00.005+02:00

El pasáu martes, 20 de mayu, el grupu d'opinión Algamar organizó en La Pola Siero la presentación del llibru de Faustino Zapico, "La revolución de 1808", editaú por Trabe. La introducción del autor fíxola Inaciu Iglesias, editor de Trabe, d'Ámbitu y del selmanariu Les Noticies.

La esposición de Zapico, mui amena, afondó nel significáu y na trescendencia d'un fechu del que se conmemoren doscientos años y que pue colocase como'l momentu de la entrada d'Asturies na dómina contemporánea. Y ello nada menos que plantando cara al mayor imperiu daquella. 1808 tien múltiples llectures y tamién munches ensiñances. Nel 2008 sorprende, seique más que nunca, la valentía d'aquella Xunta Xeneral qu'aunió tradición y revolución proclamando la so soberanía y siendo preséu de les demandes del pueblu asturianu.

25 de Mayu

2008-05-19T12:55:00.006+02:00

Con motivu de los 200 años de l'asunción de soberanía pola Xunta Xeneral del Principáu d'Asturies, Algamar quier convidavos a la presentación del llibru: "La Revoución de mayu de 1808". Actu qu'habrá de facese na Casa la Cultura de La Pola Siero el martes 20 d'esti mes a les 19:30 hores.

Na presentación intervendrán (como podéis ver nel cartelu anunciador d'enriba) amás del autor del llibru, Faustino Zapico, l'editor d'Ámbitu y Les Noticies Inaciu Iglesias.

Aguardamosvos a toos/es.

L’ESTATUTU QUE NECESITAMOS

2008-04-16T14:03:00.011+02:00

La reforma del estatutu d’autonomía d’Asturies ye inminente. Poles declaraciones de dalgunos representantes políticos paez qu’esti ye un tema poco importante, sobreveníu y qu’hai que quitar del medio; que nun tien interés pa la sociedá nin pa ellos. Abúltamos que se va intentar despachalo aína, ensin abrir un debate social y ensin enfrentase a toles implicaciones que tien.

L’estatutu yá cumplió ventiséis años y sufrió delles reformes. Pero nel contestu políticu actual esta reforma nun tien traza de ser una más, con dellos retoques téunicos. Pue resultar d’ella la redaición d’una norma llegal que va marcar pa munchu tiempu la definición y organización d’Asturies como comunidá, los nuesos drechos y obligaciones, el tipu de rellación con otres comunidaes y col Estáu. Los partíos políticos mayoritarios decidieron nel so día una vía lenta pal procesu autonómicu, y vieno transitándose per un camín con participación social escasa, asunción de competencies ruina y un papel subsidiariu de les decisiones asturianes en rellación colos intereses del Estáu.

L’estatutu d’autonomía ye por definición la norma institucional básica d’Asturies, la constitución asturiana, la llei de lleis, y por eso tien que reflexar lo qu’Asturies ye y representa, la so identidá como país, la so llingua, la so cultura. A les persones que vivimos n’Asturies va afectamos lo que s’apruebe, ye un marcu que va condicionar la nuesa realidá cotidiana. Otres normes europees o la constitución española recueyen drechos individuales y coleutivos, pero ye nel estatutu onde les circunstancies concretes d’asturianos y asturianes tienen que se reflexar, pa poder entamar proyeutos qu’ameyoren les nueses condiciones de vida.

Paezmos que la sociedá civil tien qu’asumir un papel protagonista nesti procesu. Namás asina vamos sentir l’estatutu como daqué nueso, onde tán recoyíes les tendencies per onde tien de caminar la sociedá asturiana del sieglu XXI. Namás si se consigue que la xente participe na ellaboración y se saca de los círculos téunicos o políticos podemos consiguir que l’estatutu se convierta nun preséu con trescendencia social.

Dende’l grupu d’opinión Algamar nun queremos que se mos furtie, una vez más, el nuesu drechu a participar y a vemos reflexaos na nuesa llei cimera y, polo tanto, esponemos públicamente dos plantegamientos xenéricos fundamentales y básicos que, pa nós, dan sentíu y razón a un estatutu dignu p’Asturies.

De mano tien que ser un estatutu p’Asturies. Paez una obviedá, pero nun queremos un modelu menor aplicáu a toles entidaes ensin pesu políticu; y equí los llexisladores van tener que trabayar en cuenta copiar modelos probetayos que nun cubren les nueses necesidaes. Tien que se recoyer la realidá nacional d’Asturies, la oficialidá de la llingua asturiana, aquelles instituciones hestóriques del pueblu asturianu que sirvan p’anguaño, el drechu consuetudinariu, la organización y la participación de Conceyos y parroquies, l’asunción de los niveles máximos d’autogobiernu o una financiación acordies.

Nun pue perdese la oportunidá de que los nuesos drechos individuales y coleutivos tean recoyíos nesta norma de normes. Malamente la política que se programe los va tener en cuenta si nun apaecen nesta llei fundamental. Había qu’especificar y establecer les condiciones pa que se pudiere trabayar daveres por algamar una montonera drechos, como tolos qu’afeuten al mundiu llaboral; a que toles persones tengan los mesmos drechos ensin discriminación de xéneru o opción sexual; drechu a una vivienda en condiciones; a una muerte digna; a un mediu ambiente conserváu llibre de la especulación privada y pública; a que los llabradores y los ganaderos vivan dignamente nel campu; a una educación y una sanidá públiques de calidá; a qu’a les persones mayores les instituciones públiques-yos garanticen unes condiciones de vida bones; a vivir con normalidá en cualquiera de les llingües propies d’Asturies; a tener oportunidaes de trabayu y d’integración n’Asturies pa la xente de fuera; al retornu de los emigrantes y descendientes que tuvieron que marchar y a la participación de los que siguen fuera; a una alministración al serviciu de les persones; a que les aportaciones de les organizaciones sociales se tengan en cuenta necesariamente nes decisiones polítiques.

Nel grupu d’opinión Algamar pensamos que tolo recoyío nun son más que dalgunos de los mínimos irrenunciables pa que los asturianos y asturianes tengamos la opción de construyir un proyeutu de futuru más viable, más xustu y tamién más solidariu.

Agora, la custión ye si vamos facer un estatutu nel que teamos toes y toos o van ponemos ún que nun sintamos como propiu.

Grupu d’Opinión ALGAMAR

D'espicha

2008-04-10T23:01:00.006+02:00

Al rodiu la pendiente reforma l'estatutu d'autonomía, Algamar entama una espicha'l vienres 11 a les 20:30 hores nel Llagar Sidrería Estrada de Quintana (Nava).

Interesaos podéis llamar al 625990303.

Preciu orientativu 20 Euros.

Pa finar lleerase un comunicáu asoleyando la opinión del grupu no que cinca al estatutu venideru.

Esperamosvos a toos. Salú.

SUENA ASTURIES

2008-02-23T06:19:00.002+01:00

CHARLA-COLOQUIU ENTAMÁU POL GRUPU D’OPINIÓN ALGAMAR

SUENA ASTURIES

LA MÚSICA N’ASTURIES GÜEI

Martes, 19 de febreru del 2008. Casa la Cultura de La Pola.

Al actu d’Algamar sobre la música n’Asturies asistieron setenta y picu persones y principió cola proyeición del documental “Sueña’l camín”, realizáu por alumnos del institutu Aniceto Sela de La Pola L.lena baxo’l nome de producciones L.luna L.lena, y nel que s’entrevista a varies persones del panorama musical asturianu.

Darréu Isaz Vallina Arboleya, componente d’Algamar y del grupu folclóricu y d’investigación El Ventolín, presentó a los cuatro participantes y dio-yos la pallabra pa que pintaren brevemente la so esperiencia sobre’l tema.

Anabel Santiago lo primero de too allugó hestóricamente la tonada, afirmando que’l xenéru ta documentáu d’hai poco más de sieglu y mediu. Pue definísela como cantu llibre ad libitum, y pue acompañase d’instrumentos como la gaita o’l panderu. Les denominaciones usaes nel sieglu XIX yeren tonada de la tierra y tonada arriera; el términu usáu fuera de les fronteres d’Asturies foi tonada asturiana; y cuando se fixo culta y hebo autores que componíen espardióse’l nome d’asturianada. Abordó entós el tema del purismu y cómo cantantes como El Presi o La Pastorina foron de los más nomaos pero tamién de los más criticaos polos consideraos puristes; Anabel ye de la opinión de que la pureza nun ta reñía col mestizaxe, y qu’esi procesu ye necesariu pa da-y a la tonada una trescendencia universal. Nesti sen, gallegos, andaluces y aragoneses yá fixeron esi llabor, como exemplu comentó que si daquién quier oyer cante jondo pue dir a les cueves del Sacromonte, pero tamién esiste’l grupu Ketama y otra montonera de xente reinterpretando la tradición. N’Asturies esi llabor ta tovía pendiente y hai bien de prexuicios que tan torgando que se faiga. Pa describir el panorama actual recurrió a la propia esperiencia: con trece años yá participaba en concursos y, teniendo pasao catorce años, el repertoriu d’esos concursos sigue siendo’l mesmu. Afirmó que la repetición mata la creatividá; que por eso nun ñacen tonaes nueves; y que’l futuru ta en cambiar esa mentalidá. Mencionó xente que ta trabayando nello, como los hermanos Valle Rosa, Héctor Braga, Mª Luz Cristóbal Caunedo... Tamién mencionó un par de concursos nos qu’hai una seición pa tonada d’autor, iniciativa qu’aplaude.

Chus Pedro comentó lo prestoso de ver xente mozo participando nel videu acabante proyeutar. En comparanza pue dicise qu’elli vien de les catacumbes: Camaretá ye un coleutivu de persones qu’arrincó nos setenta; nel 78 surde Nuberu como marca nel sentíu discográficu; pero Nuberu ye más qu’una persona que canta y otra que toca la guitarra, Nuberu ye un sentimientu, que ñaz na conca’l Nalón baxo’l paragües de la esquierda, del movimientu cristianu y del partíu comunista. Nuberu lleva trenta años cantando nuna llingua que nun esiste; porque la clas política s’empeñó en torgamos la llingua; pero magar nun esista oficialmente sí pa un sector significativu de la sociedá. Pa Chus Pedro la música foi fundamental na difusión del asturianu. Fixo alcordanza del primer discu: “Asturies, ayeri y güei”, un cantu a la solidaridá y al trabayu, que nel añu 1978 vendió 48.000 discos; güei les coses cambiaron abondo, eses cifres son imposibles. Na ñacencia de Nuberu hai trés partes: compromisu coles llibertaes, compromisu cola llingua, y compromisu cola música tradicional nun llinguaxe más universal, contemporaneu. Dase nel grupu eso tan de moda agora de fusión ente la tradición y la modernidá; tocáronse tolos palos: un discu acústicu, otru de rock sinfónicu, un terceru de pop... Pensando en presente comenta que-y presta la compaña na mesa, porque la vida ye una carrera de relevos y, dempués de trenta años de tirar pola mula torda, el Nuberu va volver pa Exiptu, por segunda vez. Fai alcordanza de la ufierta mui tentadora económicamente d’Hispavox nos años 80 pa dexar de cantar n’asturianu, pero ta seguru de que nun diba ser más feliz de lo que ye agora y l’alma en cuenta vendela al diañu vendióla a Asturies.

Xune quixo plantegar básicamente dos custiones: per un llau la situación de la xente músico profesionalmente falando, nesti aspeutu pon l’exemplu de Dixebra, onde hai un profesor de matemátiques, un bancariu, un rexistrador de la propiedá y dalgún músicu profesional, pero non con Dixebra, sinón como profesor de conservatoriu, etc.; y per otru llau un tema fundamental, el desconocimientu por parte del públicu de la música que se fai n’Asturies. Y esto ye frutu del desdexu de l’Alministración, nun se creó un circuitu de la música, hai obsesión por construyir infraestructures, pero nun se-yos da conteníu. A Xune paez-y qu’ehí ye onde se ta fallando dafechu. En trenta años de gobiernu autonómicu nun se notaron eses infraestructures qu’elli llama intanxibles y que teníen que dar sentíu a les otres infraestructures. Si s’entruga la causa última d’esa situación, la respuesta ye que nun hai una autonomía comunicativa realmente n’Asturies: nes emisores radiofóniques (sacante Radio Sele y dalgunes emisores llocales) nun hai una programación n’asturianu; cualquiera de les grandes emisores d’Asturies ponen la mesma música qu’en Cádiz, en Segovia o en Valladolid; y esa música ye la de grupos con una compaña potente y con dineru; porque, aclara, los númberos ún, páguense. N’otres comunidaes esa carencia iguóse con medios públicos. Faló entós de la Radiotelevisión d’Asturies (qu’elli prefier llamar asina en cuenta de Radiotelevisión del Principáu d’Asturies) na que collabora: el primer direutor, Javier Araújo, tenía interés en que se punxere música asturiana, incluso punxo un porcentaxe, el 30 %; pero entró otru responsable y revocó esa decisión, agora ponse música asturiana los sábados y los domingos pela tarde, pero música contina, ensin presentar el cantar nin el grupu, pela selmana solo hai presencia nel programa d’Ismael Arias y daqué que pon el propiu Xune. Tou esti panorama esplica esi desconocimientu del que se falaba por parte del públicu. En cuantes a la evolución de la música asturiana, Xune aclara primero que pa elli música asturiana nun ye solo la que vien de la tradición, ye toa aquella cantada n’asturianu, porque l’usu de la llingua asturianiza cualquier estilu musical; tamos asistiendo a un cambéu estéticu, cuando entamaba Chus Pedro, el paquete yera nacionalismu, llingua y música celta, agora yá nun va necesariamente xunto, pues ser nacionalista y gustate’l punk. Hai una mocedá de barriu que yá nun ta conectao colo rural; son neofalantes, y eso tien coses bones y males, tienen les zunes de los neofalantes, pero eso pasó en tolos sitios, ye dalgo que va dir puliéndose; ellos son los que van posibilitar que l’asturianu se “modernice”, entendiendo esti términu de manera rellativa, porque tan moderno ye la tonada d’Anabel Santiago, podría meyor falase de música “actual”.

Nacho Fonseca valora’l videu como mui clarificador. Confiesa que nos sos empiezos na música había una motivación de recuperación cultural y llingüística. El proyeutu de trabayu colos guah.es que foi’l grupu Seliquín ñaz en Porrúa nel añu 86, daquella arrincaba l’asignatura d’asturianu nes escueles, solo mui poco antes unos cuantos centros pilotu aniciaron la esperiencia. Había 17 rapacinos nel grupu, de los que 15 participaron nuna muestra nel teatru Campuamor, como piesllu del actu institucional de l’Academia de la Llingua nel Día de les Lletres Asturianes; el treslláu fíxose en dos taxis y el propiu coche del mayestru; nel actu taba’l presidente del Principáu nesa dómina, Pedro de Silva, al que-y gustó l’actuación; d’ehí surdió la oportunidá de grabar un discu, lo que yera daqué increyible pa ellos. Nacho nun pierde la perspeutiva de que l’oxetivu yera aportar un granu d’arena a la escolarización del asturianu; la so formación musical ye autodidacta y limitada. La xera siguió en Lieres con Xentiquina, que ta a puntu cumplir venti años. El grupu nun tien escesivos problemes pa les sos actuaciones, solicítaselos bien d’ello ensin faer muncha propaganda; fechu qu’elli atribúi a que l’actividá presta y al ser con rapazos la llingua asturiana nun produz rocea. Anuncia un discu pa zarrar venti años, porque al xubilase en cuatro años nun cunta con cumplir venticinco col grupu. Como los guah.es siempre tienen ocho años y el mayestru non, hai ciertu desgaste inevitable, y d’ehí vinieron les ganes de faer otres coses, como’l so llabor de compositor pa los discos de la so fía, Esther Fonseca. Abúlta-y que la xente que fai música ye la parte de la cultura asturiana con más fuercia, más viva y con mayor proyeición; nuna comunidá con hacia un millón d’habitantes hai una gran producción; el problema ye que la clas política nun valora que la llingua ye’l fechu cultural más importante que pue haber nuna sociedá; andúvose dando “carambelinos”, pero nun se punxo verdaderamente en valor esi patrimoniu tan importante. Ye absurdo pidir una gran demanda social, en Galicia tampoco se cortaron autopistes pa pidir la oficialidá y, a diferencia d’equí, ellí’l gallegu ta xugando un papel dinamizador fundamental. P’acabu Nacho fala de la tremenda dificultá de sacar un discu; nel casu de “Viaxe” elli decidióse pola autoproducción, lo que supón arriesgar perres propies, con una pequeña ayuda del Principáu. El trabayu con un productor ye complicáu, porque tienes que xugar col gustu d’ésti y nun tien por qué coincidir col tuyu.

Abrióse entós l’alderique a la intervención del públicu, abordando dalgún de los problemes de la música n’Asturies nesti sieglu XXI. Falando de les nueves tecnoloxíes na difusión de la música, Chus Pedro entruga a Xune, como direutor del Anuariu de la Música n’Asturies, cuántos discos salen al añu y ésti cita de memoria unos 42 nel añu 2006 y 35 nel 2007, de música n’asturianu o tradicional; Chus Pedro argumenta entós que llamar empreses a les discográfiques asturianes ye rellativo, en realidá dedíquense más bien a la filantropía, recuerda que nel añu 78 Nuberu vendió 48.000 discos, frente a 5.000 del últimu, la situación actual, en competencia con internet, col de la mochila, ye complicada. Anabel, como persona moza, ve’l futuru na dixitalización, cita datos que falen d’una cayida del 25 % de les ventes en tol Estáu nel últimu añu, pero un aumentu del 32’1 % nes descargues. Xune tampoco ta escontra l’emule, Dixebra seique vaya a Cerdeña a tocar esti branu gracies a qu’agora la música pue oyese en cualquier parte del mundiu; el problema ye de les multinacionales, acábase-yos el comederu y saquen un discursu de pérdiga, cuando en realidá hai que falar de mengua de beneficios, ye un discursu catastrofista pa poder faer reconversión pura; per otru llau opina que’l CD nun va desapaecer como tal soporte físicu, pero va convertise nun elementu más de promoción del grupu, una especie de carta de presentación, agora ta usándose como regalu de calidá d’empreses; poniéndose nel papel de productor, les productores van tener qu’adaptase a los cambeos. Chus Pedro menciona como tendencia actual la voluntá de xestión integral del artista por parte de les multinacionales; nuna dómina en que la tecnoloxía permite mercar un cantar por 0’98 €, n’Asturies tamos en pañales, sáquense munchos discos, pero por puru voluntarismu. Referente a les multinacionales del sector (hacia unes seis grandes firmes) Xune diz que tán en reconversión, dexen de tener tantos beneficios no que llamen la “división musical”, pero la mesma empresa produz n’otros sectores económicos; pa elli tienen un discursu hipócrita, puxaron pa cobrar un canon dixital por culpa la piratería y per otru llau son eses mesmes empreses les que vienden los aparatos colos que se piratia.

Énte una entruga del públicu sobre l’altor de la música en Siero, Nacho fala de qu’hai un gotu de “xovinismu” en La Pola, arguyosa de ser capital d’asturianía y de que ye’l conceyu que meyor canta d’Asturies; elli piensa que son lleendes cariñoses, d’autoapreciu, qu’en La Pola hai bona salú musical, col iconu d’Ángel Embil como centru d’un llabor qu’abarca a más xente, pero non superior a otros munchos conceyos, onde tamién se fai bona música; na so esperiencia col discu “Viaxe” cuntó con nada menos qu’ocho músicos de Siero; aprovechó tamién pa criticar la tardanza d’una infraestructura tan necesaria y demandada como l’auditoriu de La Pola.

Entrugaos pola perceición de músicos cantando n’asturianu fuera les fronteres d’Asturies, Xune comenta anécdotes de Catalunya: el so conciertu nel festival de Vic foi tresmitíu en direuto por Radio Quatre porque llamó l’atención un grupu de rock, con gaita y cantando n’asturianu; nuna entrevista na radio pidióse-yos que respondieren n’asturianu; n’otros sitios, al llau de músicos que canten en moldavo, l’asturianu nun se ve tan exóticu; sobre’l tipu de públicu qu’acude Xune contesta chanciosamente que los que ve na primer filera de los conciertos nun los dexaría salir cola fía. Chus Pedro recuerda un conciertu fuera d’Asturies onde dixo n’inglés que la música yera un llinguaxe international y recibió una gran ovación; pa elli trátase d’un problema ideolóxicu, non llingüísticu. Pela so parte Anabel recordó un conciertu nel Xovellanos con unes cien persones y otru en Castelló, onde cantó y presentó n’asturianu nun teatru con capacidá pa mil quinientes persones, con entrada de pagu, y llenu; tamién una anécdota de tar presentándose en francés y sentir dende’l públicu: “canta Chalaneru”.

Tamién se preguntó dende’l públicu pola música nel cine; Anabel cuntó que precisamente taba acabante grabar con Varillas la banda sonora d’una película de Quirós, obra de Ramón Prada. Hai una presencia de la tonada, porque la muyer del protagonista, un ecoloxista lluchando escontra la lluvia acedo, ye ella y canta tonada.

La pregunta de considerar cambiar de llicencia y nun se suxetar a la Sociedá Xeneral d’Autores contestóla Xune confesando les sos contradicciones; Dixebra son socios dende’l segundu discu, agora mesmo nueve sonlo, anque dalgunos tienen dos apercibimientos: ún por firmar un manifiestu pa constituyir la sociedá vasca d’autores; y el segundu por participar gratuitamente nun conciertu a favor de la Coordinadora Asturiana pola Insumisión; al tercer apercibimientu échenlos; reconoz que cuntar esto ye un poco d’autoxustificación, pero l’asuntu nun ye cenciellu, elli, como productor comenta a los grupos si quieren pagar a autores, munchos arrenieguen, pero tienen de saber que si nun s’asocien, en pasando venticuatro meses, la SXAE quédase colo que la productora ta obligada a pagar por esi conceutu; de toes maneres tán plantegándose lo de Creative Commons.

Música güei

2008-02-12T15:24:00.000+01:00

El Grupu d'Opinión Algamar entama una charla coloquiu sobre la música n'Asturies güei.

L'actu habrá de facese na Casa la Cultura de La Pola Siero el martes 19 de febreru a les 19:30 hores y contará cola intervención de:

Anabel Santiago.
Chus Pedro.
Nacho Fonseca.
Xulio Elipe (Xune).

Esta ye una más de les actividaes periódiques que'l Grupu Algamar vien faciendo col enfotu d'afondar nel conocimientu de la realidá asturiana d'anguaño.

Esperamosvos a toos/es.

Obligatoriedá llingüística

2008-02-06T17:47:00.001+01:00

Pa toos/es aquellos/es esmolecíos/es pol peligru que pal español representen les otres llingües del estáu, ahí van una riestra de lleis, decretos y disposiciones que curien el caltenimientu y espardimientu de la so amenazada llingua.

Nota: Esta que vien darréu ye una torna fecha del orixinal catalán de Francesc Ferrer i Gironès que se pué atopar equí:

http://www.contrastant.net/llengua/obligatori.htm

Normes positives aprobaes pol Estáu español qu’obliguen al usu de la llingua castellana

• Constitución española (27 d’avientu del 1978), obliga al conocimientu del castellán.

• Llei 85/78 Reales Ordenances de les Fuercies Armaes (28 d’avientu del 1978), obliga al usu del castellán nos actos de serviciu.

• RD1011/81 reglamentación sobre la comercialización de grasa comestible. Obliga al etiquetáu n’español.

• RD 334/82, que regula l’usu del castellán na rede viaria, nos tresportes públicos y pasos fronterizos.

• RD308/83, reglamentu sanitariu del aceite vexetal, impón el castellán.

• RD 2872/83, sobre reglamentu de xiros postales y telegráficos, impón los impresos en llingua castellana.

• RD1521/84 sobre reglamentación téunico-sanitaria de los productos de pesca, les etiquetes obligatoriamente n’idioma español.

• Llei 30/1984, sobre midíes de reforma de la función pública, obliga tácitamente al conocimientu del castellán a los opositores y concursantes.

• RD 1915/84 sobre reglamentación de matachinos de coneyos y almacenamientu y distribución de la carne. Obliga al etiquetáu en llingua española oficial del Estáu.

• RD 2223/1984 qu’aprueba’l reglamentu xeneral d'ingresu del personal al serviciu de l'alministración del Estáu, impón tácitamente’l castellán.

• Orde Ministerial 29 de marzu del 1984, qu’aprueba la norma de calidá pa piescos con destín al mercáu interior.

• RD 179/85 que reglamenta los matachinos d’aves y la comercialización de la carne. Les etiquetes tienen que se redactar obligatoriamente en la llingua española oficial del Estáu.

• Llei Orgánica 6/85 del Poder Xudicial impón la llingua castellana en tolos procedimientos xudiciales. Tolera con condiciones dientro del territoriu catalán la llingua catalana.

• RD 1348/85 sobre’l reglamentu d’ordenación de les aseguradores privaes. Impón el castellán pa la presentaciónn de la documentación alministrativo.

• O. M. de 29 de mayu del 1985, aprueba normes p’albaricoques destinaos al mercáu interior.

• OM 19 d’agostu del 1985, sobre norma reguladora del comerciu esterior de coles chines.

• OM 23 de setiembre del 1985, sobre etiquetáu de productos de peletería.

• OM de 15 d’ochobre del 1985, sobre norma de calidá pa moxones, amasueles y berberichos en conserva.

• OM de 15 de payares del 1985 sobre etiquetáu de peres, mazanes y uves. Impón el castellán.

• RD 2216/1985, sobre envasáu y etiquetáu de sustancies consideraes nocives y peligroses. Impón el castellán.

• RD 2374/1985, sobre especificaciones téuniques de les centrales telefóniques privaes. Impón el castellán.

• RD 2323/1985, sobre reglamentación pa ellaborar, almacenar y tresportar los sucedaneos del café.

• RD 2379/1985, de 20 de payares sobre los aparatos receptores de televisión.

• RD 2706/1985, sobre autómates industriales programables; ye obligatorio que los suministradores y fabricantes tengan los catálogos en castellán.

• OM 14 de xineru del 1986, sobre normes de calidá de la carne picao de vacunu, ovinu y porcinu. Recueye l’etiquetáu del decretu 2058/82.

• Llei 11/86 de patentes, impón el castellán na documentación presentao.

• OM de 24 de marzu del 1986, sobre l’etiquetáu de los ayos y apios, obliga "polo menos" a usar la llingua española.

• RD 1070/1986, sobre terminales telefóniques y módems, impón el castellán na documentación.

• OM 29 d’ochobre del 1986, sobre normes de calidá de la pataca, impón l’usu del castellán nes etiquetes.

• OM de 29 d’ochobre del 1986, sobre les tripes naturales con destín al mercáu interior, impón l’etiquetáu en castellán.

• OM de 29 d’ochobre del 1986, sobre’l tocín y el tocín entevenao; impón el castellán nes etiquetes.

• RD llexislativu 1257/1986 de 13 de xunu, pa l’adaptación de la llei 3/1980 a les normes de la CEE en materia cinematográfica.

• RD 1495/1986, qu’aprueba’l reglamentu de seguridá de les máquines. Obliga a que les instrucciones tean "polo menos en castellán".

• RD 2003/86, aprueba’l reglamentu orgánicu de los cuerpos d’oficiales, auxiliares y axentes de l’alministración de xusticia. Esixe’l castellán y da 6 años d’antigüedá al conocimientu del catalán.

• RD 2551/1986, sobre ellaboración y comercialización del aceite de magaya refinao, obliga al etiquetáu en castellán.

• RD928/1987, referente al etiquetáu de los productos testiles. Impón el castellán.

• RD 1094/1987 de 26 de xunu. Reglamentación sobre ellaboración y comercialización de cereales.

• RD 1261/1987 de 11 de setiembre, sobre reglamentación de la ellaboración, fabricación y comercialización d’azucre destinao al consumu humanu.

• RD 1174/87 regula’l réxime xurídicu de los funcionarios d’alministración llocal. Por resolución del 14 d’avientu del 1987, en superando’l conocimientu del castellán, podrá esaminase de catalán, pero namás como méritu.

• OM 1 de xunetu del 1987, qu’aprueba la norma de calidá del yogur, impón el castellán.

• RD 1261/1987, qu’aprueba la reglamentación téunico-sanitaria del azucre destinao al consumu humanu. Obliga al etiquetáu en castellán.

• RD 1453/1987, qu’aprueba’l reglamentu de llimpieza, conservación y tiñíu de testiles, cueru y pieles. Obliga a que la información sía "polo menos en castellán".

• Decret 1496/87, sobre consiguir, emitir y homologar títulos universitarios. Impón la llingua castellana. Subsidiariamente permite la llingua catalana.

• OM de 23 y 27 de payares del 1987, que regulen los platanos y cadápanos respeutivamente. Obliga al etiquetáu en castellán.

• RD 58/88, sobre proteición de los drechos del consumidor a los servicios d’igua d’aparatos d’usu domésticu. Obliga a que "polo menos en castellán".

• RD 197/1988 del 22 de febreru, sobre fabricación y tráficu d’oxetos ellaboraos con metales preciosos.

• RD 192/1988 del 4 de marzu, sobre la venta y usu del tabacu pa protexer la salú.

• RD 429/88 qu’aprueba’l reglamentu orgánicu del cuerpu de secretarios xudiciales. Obliga al conocimientu del castellán, y otorga 6 años d’antigüedá pol conocimientu del catalán.

• OM de 6 de febreru del 1988, sobre certificaciones de los reproductores bovinos de raza pura.

• OM de 28 de marzu del 1988, qu’aprueba les normes de les caseínes y los caseinatos alimentarios. Obliga al etiquetáu en castellán.

• RD 349/88 sobre la reglamentación téunico-sanitaria de productos cosméticos. Impón l’usu de la llingua española oficial del Estáu.

• RD 472/1988 sobre xeneración d’aerosoles. Obliga a que polo menos sía en castellán l’etiquetáu.

• Llei 10/1988 de televisión privada. El 20% de les películes comerciales emitíes mensualmente han ser "d’espresión orixinaria española".

• Llei 11/88 sobre proteición de les topografíes de los semiconductores. Impón el castellán, y si se presenten n’otra llingua tien qu’haber traducción al castellán.

• RD 833/1988 qu’aprueba’l reglamentu d’esperdicios tóxicos y peligrosos. Obliga a que, polo menos, la llingua española oficial del Estáu tea nos recipientes.

• RD 1122/88 qu’aprueba la norma xeneral d’etiquetáu, presentación y publicidá de los productos alimentarios envasaos. Obliga a usar el castellán como mínimo.

• Llei 32/88, de marques. Obliga a usar el castellán nos documentos presentaos.

• Llei 38/1988 de demarcación y planta xudicial. Pa presidente del tribunal superior de xusticia, el saber catalán ye namás un méritu.

• RD 1231/1988 sobre’l tresporte y comercialización del café. Obliga al etiquetáu en castellán.

• RD 1232/1988 sobre sucedaneos del café. Obliga también a usar el castellán nel etiquetáu.

• RD 1338/1988 sobre ellaboración y venta d’horchata de chufa. Etiquetáu obligáu en castellán.

• RD 1425/1988 sobre productos plásticos destinaos a envasar productos alimentarios. Manda que l’etiquetáu sía en castellán.

• RD 1426/1988 sobre circulación y comerciu de preparaos alimentarios pa réxime dietéticu. Obligación d’etiquetalu en castellán.

• RD 1468/88 qu’aprueba’l reglamentu d’etiquetáu y presentación de la publicidá de productos industriales destinaos a la venta direuta a los consumidores. Obliga a usar "polo menos la llingua española oficial del Estáu”.

• OM de 26 de mayu del 1988 sobre modelos del rexistru civil (defunción y de criatures albortaes). Obliga al castellán y tolera’l catalán como acompañante.

• OM de 11 de xunetu de 1988 sobre normativa del calzáu. Obliga al etiquetáu informativu en castellán.

• OM de 30 de xunu del 1988 sobre’l comerciu del azafrán. Etiquetáu obligáu en castellán.

• OM 28 de xunu del 1988 sobre aparatos d’elevación y mantenimientu de grúes-torre desmontables pa obra. Too tien de ser polo menos en castellán.

• OM de 28 de xunu del 1988 sobre aparatos de presión d’aire comprimío. La redacción en castellán pue esixise nel momentu final de ponelu en disposición de los usuarios.

• OM de 5 d’avientu del 1988, sobre piensu simple. Obligatoriu’l castellán.

• Llei Orgánica 2/89 procesal militar. Obliga a usar el castellán en toles actuaciones xudiciales. Al catalán pue traducise.

• OM de 30 de xineru del 1989 sobre comercialización de piensu compuesto. Obliga a usar el castellán nos envases.

• RD 126/1989 sobre comercialización de pataques fritíes. Obliga a usar el castellán nos envases y retulación de los productos.

• RD 149/1989 sobre pintura, barniz, tinta d’imprimir y cola. Obliga a usar el castellán nel etiquetáu.

• OM 21 de marzu del 1989, sobre gochu salao y tocín entevenao. Obliga a usar el castellán nel etiquetáu.

• RD 645/1989 sobre pesca y acuicultura, obliga a usar el castellán nos datos obligatorios del etiquetáu.

• OM de 20 xunetu del 1989 del ministeriu de xusticia sobre fe de vida, ñacencia, casoriu y defunción, obligatoriamente en castellán, con testu en catalán subordináu.

• RD 1066/1989 qu’ordena les telecomunicaciones. Obliga a usar el castellán nes memories téuniques.

• RD 1597/89 qu’aprueba’l reglamentu del rexistru mercantil. Obliga a que les inscripciones se faigan esclusivamente en castellán.

• Llei 21/1990 de 19 d’avientu, sobre les aseguradores de vida y aseguradores privaes.

• Llei 25/1990 de les melecines. Obliga a que’l testu tea polo menos en llingua castellana.

• OM 15 de febreru del 1990, sobre l’etiquetáu d’artículos de marroquinería, y viaxe.

• OM de 15 de febreru del 1990, sobre la normativa del etiquetáu informativu de los guantes.

• RD llexislativu 339/1990, que desendolca la llei sobre tránsitu, circulación de vehículos y seguridá viaria.

• RD 472/1990 de 6 d’abril que regula los disolventes d’estraición usaos na ellaboración de los productos alimentarios.

• RD 668/1990 de 25 de mayu, sobre ellaboración y comercialización de materiales poliméricos en rellación colos productos alimentarios.

• Llei 7/1991 que crea l’institutu Cervantes, con oxetivos namás que pal "español".

• Llei 30/1991 de 20 d’avientu, sobre la redacción de los testamentos, obliga a usar el castellán naquellos territorios que nun sían forales.

• OM 3 d’abril de 1991, que regula la distribución y exhibición del material audiovisual, autoriza namás la traducción al castellán.

• RD 162/1991 fabricación y comercialización de los plaguicides. L’etiquetáu obligatoriu polo menos en castellán.

• OM de 14 de xunu del 1991, sobre productos fertilizantes. La etiqueta y l’envase habrán de tar redactaos polo menos en llingua castellana.

• RD 475/1991 sobre productos cosméticos. Obliga al usu del castellán.

• OM del 8 d’abril del 1991, sobre reglamentu de seguridá de les máquines. Obliga a usar polo menos el castellán nes plaques, instrucciones y etiquetes.

• RD 1082/1991 sobre la cura y mantenimentu de les lentes de contautu. Impón el castellán.

• RD 1109/1991 sobre alimentos ultraconxelaos. Obliga a usar el castellán nes etiquetes.

• RD 1111/1991 sobre los aditivos alimentarios, impón el castellán.

• RD 1164/1991 sobre comerciu d’agua de beber envasao. Obligatoriu’l castellán nes etiquetes.

• RD 1534/1991 sobre circulación y comerciu de pastes alimentaries. Obliga a usar el castellán.

• RD 1650/1991 sobre ellaboración y venta de zusmiu de fruta. Obligación d’etiquetar en castellán.

• RD 1688/1991 sobre preservativos de cauchu. Nos envases oblígase a usar polo menos la llingua castellana.

• RD 1809/1991 sobre circulación y comerciu de preparaos alimentarios en réxime dietéticu. Obligación de faer en castellán l’etiquetáu.

• RD 1810/1991 sobre circulación y comercialización de carambelos, chicles, confites y llambiotaes. Ye obligatoriu’l castellán nel etiquetáu.

• RD 13/1992, sobre circulación urbana ya interurbana, obliga a que les señales sían "polo menos nel idioma español oficial en tol territoriu del Estáu".

• RD 15/1992 sobre ellaboración y venta de bébores refrescantes. Obligación d’envasales en castellán.

• RD 212/1992 sobre etiquetáu de los productos alimentarios envasaos, qu’anula’l RD 1122/88. Obliga a que necesariamente polo menos tean en llingua española oficial del Estáu.

• RD 510/1992 que regula l’etiquetáu de los productos del tabacu. Obliga al usu del castellán y tolera’l catalán subsidiariamente.

• RD 930/1992 sobre propiedaes nutritives de los productos alimentarios. Obligación d’etiquetar en castellán.

• RD1408/1992 sobre preparaos pa naciellos. Obligación d’etiquetar en castellán.

• RD1436/1992 sobre carne picao y carne en cachos. Obligación d’usar polos menos el castellán.

• Llei 30/1992 sobre réxime xurídicu de les alministraciones públiques y del procedimentu alministrativu común. La llingua de los procedimientos tramitaos pola alministración del Estáu tienen de ser en castellán. Pue usase’l catalán namás nos escritos que se dirixan.

• OM 12 de xunu del 1992, que regula les pruebes d’aptitú pal accesu a les facultaes y colexos universitarios. Les pruebes namás n’español.

• RD 19/1993 de midíes urxentes pa la cinematografia, qu’impón cuotes pal cine en versión doblada, y coles sanciones pertinentes.

• RD 308/1993 sobre comercialización de moluscos bivalvos vivos. Obliga al usu del castellán nel etiquetáu.

• RD 349/1993 sobre comercialización de llexía. Etiquetáu, presentación y publicidá en castellán.

• RD 479/1993 regula los radiofármacos d’usu humanu. Los prospectos habrán ser en castellán.

• RD 731/1993 sobre provisión de sitios de trabayu pa funcionarios de l’alministración llocal con habilitación de caráuter nacional. Impón el castellán, y otorga puntos de méritu pal catalán.

• RD 1078/1993 qu’aprueba’l reglamentu sobre envasáu y etiquetáu de los preparaos peligrosos. Obliga al usu del castellán asina: "polo menos na llingua española oficial del Estáu".

• RD 1904/1993 sobre producción y comercialización de productos cárnicos y otros productos d’orixe animal. Obliga al usu del castellán nel etiquetáu.

• RD 2070/1993 qu’aprueba’l reglamentu téunico-sanitariu de la vinagre. Obliga al usu del castellán nel etiquetáu.

• RD 2236/1993 que regula l’etiquetáu y el prospectu de los medicamentos d’usu humanu. Obliga que polo menos na llingua española oficial del Estáu.

• RD 124/1994 que regula l’etiquetáu y la información referente al consumu d’enerxía y otros recursos de los aparatos d’usu domésticu. Impón el castellán.

• OM de 4 de xunetu del 1994 sobre utilización y comercialización d’enzimes, microorganismos y los sos preparaos na alimentación animal. Obliga a qu’en toles indicaciones polo menos sía usada la llingua castellana.

• RD 1185/1994 sobre l’etiquetáu de los productos del tabacu distintos de los pitos. Obliga al usu del castellán y almite otres llingües.

• RD 1679/1994 sobre condiciones sanitaries na producción y comercialización de lleche crudo, lleche tratao térmicamente y productos llecheros. Obliga al usu del castellán nel etiquetáu y nos certificaos sanitarios.

• OM 10 d’ochobre del 1994 sobre control y certificación de llabores y plantes de viveru. Obliga al usu del castellán nes indicaciones obligatories.

• RD 2163/1994 sobre comercialización y autorización de productos fitosanitarios. Obliga al usu del castellán nes etiquetes.

• RD 2208/1994 que regula los medicamentos homeopáticos d’usu humanu de fabricación industrial. Obliga espresamente a usar la llingua castellana nes etiquetes.

• RD 2549/1994 sobre’l reglamentu de los aparatos de presión, referíos a xeneradores d’aerosoles. Obliga al usu del castellán nel etiquetáu.

• Resolución 9 de xineru del 1995 del ministeriu de cultura, que da ayudes pa la creación de guiones cinematográficos. Obliga a presentalos en castellán, inclusive aquellos que se redactaren n’otra llingua española.

• Llei 30/1995 d’ordenación y supervisión de les aseguradores privaes. Obliga a que les pólices tean en castellán.

• RD 53/1995 sobre circulación y comercialización de cerveza y de malta llíquido. Obliga a usar el castellán nel etiquetáu.

• RD 109/1995 sobre los medicamentos veterinarios. Obliga a usar el castellán nos prospectos.

• RD 110/1995 sobre medicamentos homeopáticos veterinarios. Obliga a usar el castellán igual que na norma anterior.

• RD 157/1995 sobre piensos melecinales. Obliga al etiquetáu polo menos na llingua española oficial del Estáu.

• RD 733/1995 sobre emisión de títulos académicos y profesionales correspondientes a les ensiñances establecíes na Llei Orgánica 1/1990. Obliga a que sían en castellán.

• RD 929/1995 de 9 de xunu sobre’l reglamentu de control de les plantes de viveru.

• OM de 6 de setiembre del 1995 sobre la norma xeneral de calidá pa la lleche pasterizao destinao al mercáu interior. Obliga al usu del castellán nel etiquetáu.

• Orde de 6 de setiembre del 1995 sobre la norma xeneral de calidá pa la lleche concentrao destinao al mercáu interior. Obliga al usu del castellán nel etiquetáu.

• RD 1718/1995 de 27 d’ochobre sobre l’etiquetáu de los materiales de los componentes principales del calzáu.

• RD 1787/1996 de 19 de xunetu, qu’aprueba’l reglamentu de los equipos de telecomunicación.

• RD 1784/1996 de 19 de xunetu, qu’aprueba’l reglamentu del rexistru mercantil, obliga a faer les inscripciones rexistrales en castellán.

TOLERANCIA EN CASA

2007-11-29T13:44:00.000+01:00

Dende’l grupu d’opinión ALGAMAR siempre tamos dispuestos/es al diálogu y al discutiniu; anque delles veces les postures enrocaes faen que les conversaciones se conviertan en diálogos de besugos o de sordos. Normalmente ye inútil el discutiniu sobre la llingua asturiana con Javier Fernández. Pero nes declaraciones que fexo esti día soltó una fras contundente que mos prestó. Nós, como la inmensa mayoría de les persones, nun podemos menos que tar d’alcuerdu con que “los raigaños de la intolerancia afinquen na sobrevaloración de lo propio”.

Claro que les coses nun son tan inocentes como paecen y igual merez un pequeñu análisis. Lo primero de too hai que dicir que los mensaxes tienen un contestu y la so comprendoria camuda dependiendo d’esti. Nun ye lo mesmo dicir la mesma fras a los banqueros de Wal Street qu’a los inmigrantes de les pateres. L’afirmación ta fecha falando de la llingua asturiana y nun congresu de les Mocedaes Socialistes. ¿Ye un tirón d’oreyes a esta organización pola so defensa de la oficialidá de la llingua asturiana? ¿Faise entós dende la “tolerancia” de la dirixencia socialista a les bases? Per equí podríamos siguir, pero solo queremos entrugar una cosa ¿les altes instancies d’un partíu tienen de proclamar doctrina o recoyer sensibilidaes y respetar la pluralidá de les bases?

Un contestu más ampliu allúgamos nel debate sobre la reforma del estatutu asturianu. Tala reforma ta inxerta nun procesu aniciáu n’otres comunidaes autónomes y propiciáu por Zapatero, nun apueste ideolóxicu determináu: dende una opción política respetuosa, tolerante y abierta preténdese llegar a consensuar testos llexislativos que recueyan la pluralidá social, cultural y nacional del Estáu. Ello nun se fai ensin discutiniu, pero a la fin llegóse a un ampliu consensu en Valencia, a una mayor implicación del socialismu en Catalunya, a reformes unánimes n’otros sitios... Solo la cúpula de la FSA paez siguir encerriscada en defender un modelu d’estatutu que contradiz les directrices d’ampliu consensu democráticu ensayaes per uquiera nel so partíu.

Podría pensase que’l contestu social asturianu tien dalgo específico. Pero les encuestes sociolóxiques dan un porcentaxe mayoritariu d’asturianos (60 %, vid. Llera Ramo, Estudiu sociollingüísticu d’Asturies, 2003) que tán a favor de la oficialidá. Teniendo en cuenta la distribución de votos, a lo menos una minoría de los dirixentes y una mayoría de los votantes del PSOE n’Asturies tán a favor, porque la encuesta ta fecha n’Asturies y equí la xente vota lo que vota. Nun paez entós que la crítica tea basada nuna adaptación al sentir mayoritariu de la sociedá asturiana, nin siquier a la sensibilidá mayoritaria del electoráu socialista asturianu.

Entrando nel nivel de les motivaciones personales, la observación tendría’l so máximu valir si formare parte d’un exerciciu d’autocrítica. Que sepiamos la llingua d’espresión del señor Fernández ye’l castellán, entós ta falando d’una crítica a otros que faen un actu d’intolerancia sobrevalorando l’asturianu. Equí ye onde mos perdemos y la fras dexa de ser aclaratoria. ¿Quier dicer el señor Fernández que pidir la oficialidá ye sobrevalorar una llingua? Nel Estáu español son oficiales el gallegu en Galicia, el vascu n’Euskadi y en Nafarroa, el catalán en Catalunya y Baleares, en Valencia col nome de valencianu, l’aranés nel so valle, el castellán en tolos llaos. ¿Piensa’l señor Fernández que sobrevaloramos la llingua por pidir el mesmu tratu? ¿Por qué’l Partíu Socialista defende en toes eses comunidaes la llingua autóctona y equí non? ¿Oficializar el gallegu y el catalán nun ye sobrevalorar, pero sedríalo faer lo mesmo col asturianu? La lóxica de l’afirmación esfaraguya contestualizando. D’un filósofu quiciabes pudiéremos almitir orientaciones xenériques, nun políticu los fechos y el contestu ye clave.

Per otru llau, ye importante conocer los oríxenes; pero tamién ye clave tener en cuenta les consecuencies: la intolerancia tien como efeutu la discriminación; una persona intolerante piensa que los demás nun tienen por qué gociar de les mesmes prerrogatives qu’ella, que ser diferente supón nun ser iguales en cuantes a drechos. Si se falare d’un asuntu propiu pue entendese la prudencia del señor Fernández en nun sobrevaloralo y podría pensase incluso n’arrenunciar a ciertos drechos. La custión ye que’l señor Fernández nun ye usuariu del asturinau solo fala castellán, a lo menos públicamente, cuando falamos d’oficialidá tamos nesi ámbitu públicu, lo que caún fale en casa ye asuntu de la sociollingüística non de la llei. Entós el señor Fernández ta acusando de sobrevaloración a los asturfalantes y que “toleremos” que la nuesa llingua siga arrequexada nel ambiente familiar y nun s’use con normalidá públicamente. Pero elli sí pue usar en tolos niveles públicos la suya (tamién nuesa): el castellán. ¿Nun tenemos entós los mesmos drechos qu’elli? ¿Intolerancia?

Dempués el señor Fernández fai una trampuca: nun quier la oficialidá, pero sí defender la llingua: “preservar la llingua asturiana ta bien, pero glorificala non”. Tamos d’alcuerdu: dexen de dicir que quieren muncho al asturianu, dexe’l presidente Areces de proclamar que la fala en casa, dexen de lleer poemes nel parllamentu, dexen de subvencionar “el requexu del bable” en periódicos y radios; en vez d’eso recueyan nel estatutu la oficialidá y desarrollen llexislativamente esi drechu d’una parte de la sociedá asturiana. Pero tanto querer “preservar” la llingua y nin siquiera son quien a respetar la Llei d’usu actual... la so tolerancia nun llega a almitir qu’un trabayador del Principáu pida les vacaciones o un permisu pa operase n’asturianu, tampoco pa qu’una emisora de radio en llingua asturiana disfrute de la llicencia comercial que-y correspuende, o pa que se puedan lleer tesis n’asturianu na Universidá, nin pa qu’un rapaz amazcaráu de pita pueda pidir respetu pal asturianu con una pancarta ensin que lu detengan, nin pa qu’haya una programación digna na llingua’l país na “so” tele... ¿En qué quedamos podemos usar la llingua como instrumentu de comunicación o non? ¿O “preservar” quier dicir grabar un monólogu nun CD y guardalu nun muséu más de cartón-piedra?

Supongo que nesa mesma llinia convencerán al gobiernu d’España pa que tranque l’institutu Cervantes, se dexe de falar del español como instrumentu de cultura y se suspendan les campañes y la gran cantidá de dineru pa promocionalu. Si los preseos de comunicación nun precisen glorificase ¿pa qué meter perres nello? (más de 89 millones d’euros pal 2007). Nel 2005 dióse-y el Premiu Príncipe d’Asturies de comunicación y humanidaes, xunto cola Alianza Francesa, la sociedá Dante Alighieri, el British Council, el Institutu Camoes y el Goethe-Institut, toes elles instituciones que promocionen llingües como instrumentos de cultura. Sedrá que l’asturianu ye la única llingua del mundiu condergada a solo ser “instrumento de comunicación”? Y oxalá fore asina, pero quieren que sía instrumentu de comunicación solo en casa, onde nun mos tengan qu’aguantar, yá viemos cómo acaben los intentos d’usar l’asturianu n’ámbitos públicos.

Pero Fernández pasa percima del aspeutu cultural, elli va direutamente a lo que-y duel: instumentu ideolóxicu. Suponemos que nun quier dicir que tolos paisanos y paisanes de los pueblos d’Asturies solo por falar asturianu sían separatistes; tampoco l’altu porcentaxe de militantes del partíu socialista que la usen a diario. Elli refierse a los que “manipulamos” l’usu de la llingua pidiendo la oficialidá, claro. Eso sí ye profilaxis política, di que sí, qu’empieces dando un drechu y van acabar por querer cambiar les élites polítiques... Ye igual qu’haya xente asturiano de tolos colores políticos reclamando coherencia pa cola defensa del asturianu, la cosa ye desaniciar a esi grupín de separatistes. La más elemental etiqueta democrática debiera concluyir que la opción nacionalista n’Asturies ye tan digna como les demás y onde se tien que xugar la so viabilidá ye nes eleiciones. Pero non, hai que cortalo pela freba. Y tenga cuidáu’l señor Fernández cola montonera gaiteros, que póneste a tocar la gaita en vez de la guitarra y cualquier día pienses qu’esto nun ye España.

Nun somos a calletrar qu’una sociedá que tien varies llingües sía más tolerante si solo reconoz oficialmente a una que si les reconoz a toes. Y si tamos d’alcuerdu en que la sobrevaloración de lo propio pue llevar a la intolerancia; tampoco hai qu’escaecer que la inorancia de la propia realidá trai la falta de respetu pola de los demás. Nun mos paez qu’una persona que nun-y gusta la pluralidá de la sociedá na que vive vaya a ser quien a respetar la pluralidá del mundiu. Nós nun llegamos a ser cosmopolites, tamos más bien pola aldea global, porque sí mos considermos internacionalistes, de los internacionalistes a los que-yos gusta la variedá cultural, llingüística, musical y hasta gastronómica d’esti planeta, non de los que querríen una sociedá y un mundiu uniforme, con una forma de pensar y una sola llingua, por supuesto la d’ellos. Nun somos d’esos ciudadanos del mundiu que quieren dir a tolos llaos y sintise como en casa, queremos dir a tolos llaos y sentimos como en casa d’un hermanu; somos hermanos nun queremos ser clones; queremos entendemos y compartir ilusiones con toles persones del planeta, non solo comunicamos porque ellos falen español. Abúltamos que’l señor Fernández tovía nun ta al tanto de les actualizaciones del diccionariu d’español, l’acepción hasta agora de cosmopolita ye: “1. adj. Dicho de una persona: Que considera todos los lugares del mundo como patria suya”, pero l’avance de la vixésimatercera edición diz: “1. adj. Dicho de una persona: Que se ha movido o se mueve por muchos países y se muestra abierto a sus culturas y costumbres”. Porque efeutivamente, pa nós les llingües nun son solo un mediu de comunicación, queremos entendemos, non solo comunicamos. Como somos los primeros en falar, respetar y pidir respetu pa la nuesa llingua paezmos que vamos ser a entender meyor que n’otres partes del mundiu o nesta Asturies de toos/es se pida tamién respetu pa la cultura y les llingües que van llegando pa enriquecela. ¿O pue respetase lo d’otros odiando lo qu’ún tien en casa?

En fin señor Fernández que la fras prestómos, asina, fuera contestu, pero rara vez les altes xerarquíes dende posiciones de fuercia dan lleiciones de tolerancia, y menos si la fin (non solo de los sos discursos sinón de les sos obres) ye nun respetar a minoríes. Nós naguamos por una Asturies plural, onde ser asturianu/a sía trabayar y vivir n’Asturies, onde los/es inmigrantes s’integren, onde los/es emigrantes mozos/ces nun tengan que colar, onde les opciones polítiques asuman el discursu de les minoríes, onde les lleis respeten los drechos de muyeres, homosexuales, paraos, mocedá... Queremos un estatutu onde quepamos toos. Usté va vese reflexáu nelli, de xuru. Los/es asturfalantes ¿nun cabemos?

Manifestación del 24 de payares

2007-11-27T11:01:00.000+01:00

Equí vos apurrimos unos videos de la manifestación del sábadu 24 ya que tal paez que los medios "oficiales" y la mayoría de los privaos taben mirando pa otru lláu y, magar el procuru, la esmolición y l'enfotu de dellos profesionales, nun se decataben (pa variar) de lo que pasaba na cai.

El primeru ye de la Manifestación:

Agora la marcha dende Mieres

Y la llectura pa finar l'actu

Gracies a Glayíu, AsturNewsTv y VityUvieu

L’ASTURIANU: OFICIALIDÁ

2007-11-15T13:40:00.000+01:00

MESA REDONDA Y COLOQUIU ORGANIZAOS POR ALGAMAR

Martes, 13 de payares del 2007. Casa la Cultura de La Pola.

La mesa redonda que’l grupu d’opinión Algamar organizó sobre la oficialidá de la llingua asturiana convocó a cerca de cuarenta persones en La Pola.

Algamar ta dientro del Conceyu Abiertu pola Oficialidá y aborda esti tema como actu preparatoriu de les marches y la manifestación que’l sábadu 24 de payares va reclamar que na reforma estatutu d’autonomía s’incluya al asturianu como llingua cooficial d’Asturies.

P’afondar nel tema dende diversos puntos de vista taben presentes Beatriz Redondo Viado, direutora del selmanariu Les Noticies; Penélope Miranda Fernández, responsable del Serviciu de Normalización Llingüística del conceyu L.lena; y Xurde Blanco Puente, lletráu del serviciu xurídicu del Principáu d’Asturies. David Rivas Infante, profesor d’estructura económica na universidá Autónoma de Madrid, nun pudo acudir por compromisos académicos inaplazables.

Escomencipió falando Beatriz R. Viado, qu’allugó l’asuntu de la oficialidá nel campu xurídicu. Pero quixo tamién resaltar que la llingua, como ferramienta de comunicación, va tener mal futuru si nun tien utilidá d’usu pa la xente. Valoró l’esfuerciu militante de les persones que reivindiquen l’asturianu, pero tamién mencionó que bien de veces amazcárase la llingua énte l’alministración; nun se reclama’l drechu a usar l’asturianu, cuando los asturfalantes pagamos los mesmos impuestos que los demás. Hai casos, como’l de Xurde Blanco o’l de Faustino Zapico, en que’l conflictu ta plantegáu nel terrén de l’alministración y non nel de la sociedá, pero son solo dellos casos, nun hai un conflictu tan grande qu’afeute a les decisiones de l’alministración. El movimientu de reivindicación llingüística ye, entós, testerón, pero non eficiente; el conflictu pa ser efeutivu habría ser mayor y tocar dos niveles sensibles: el d’orde públicu y el colapsu alministrativu. Viado citó a Ninyoles pa destacar que los conflictos llingüísticos prodúcense ente grupos y non ente llingües. Nesti sen la estratexa de la FSA nun ye pa nada irreflexiva y gratuita: tresllada l’enfrentamientu al nivel social y saca pa ello’l discursu de la imposición. Énte esto, ñegar la imposición ye siguí-yos el xuegu, nun salir del nivel de discutiniu social; había qu’empecipiar a dicir que sí habría imposición: pa l’alministración. Ún de los pilancos importantes que ve Viado ye la clas funcionarial, roceana a cambeos que puedan afeutalos; la primera rellación de la clas política ye con ellos, y eso pue suponer una distorsión nel análisis. El discursu de los dirixentes del PSOE y PP ta claru, neso hai declaraciones netes: la xente pue falar asturianu si quier, ellos nun ven problema, si la xente nun fala ye por falta disciplina y entós hai que los castigar ignorándolos. Viado recurrió a un artículu de Ruitiña en Les Noticies pa dar una vía posible: hai que consiguir que dean un primer pasu que yá nun-yos permita retroceder: la “normalización”, la recuperación toponímica, los servicios de normalización nos Conceyos, la lliteratura, la Llei d’usu... son pequeños espacios dende los qu’enanchar y ganar terrén. Ye verdá tamién que munches veces hai fechos reales, pero non significativos, la páxina web del Principáu ta n’asturianu, ta bien, podemos consultar n’asturianu, pero ye una opción secundaria, solo si la busques vas a ella, nun consigue una visibilización de la llingua. En cuantes a la presencia del movimientu de reivindicación nos medios de comunicación la ponente foi crítica: el discursu volvióse repetitivu y ta asumíu como un ruxerrux de fondu. Como conclusión Viado defendió l’usu de diverses táutiques, nun hai por qué escoyer solo una, nun debería haber discursos escluyentes.

Penélope Miranda espunxo los dos puntos de vista qu’hai n’Asturies agora sobre la contraposición oficialidá-normalización. Una primer teoría pretende que la normalización podría sustituyir a la oficialidá. Miranda piensa que’l llabor de recuperación de la toponimia, los actos de la Selmana les Lletres o les diferentes subvenciones que fomenten l’asturianu, por mui interesantes que sían, nun son la oficialidá nin puen facela innecesaria. Como téunica en normalización llingüística ún de los llabores que s’han de faer ye’l del billingüismu alministrativu; la tresversalidá ye ún de los principales principios rectores del trabayu d’un serviciu de normalización, de manera que l’usu del asturianu afeute a tolos niveles de l’alministración. El problema ye que munchos de los llabores y de les campañes entamaes nun tán inxertes nun proyeutu coherente de política llingüística asumíu polos poderes públicos, sinón que los téunicos de los servicios tuvieron qu’organizase nuna asociación y reclamar non solo condiciones llaborales sinón compromisos políticos. Esa falta de proyeutu global nótase en que la Oficina de Política Llingüística del Principáu ye cuasi un serviciu de normalización d’un Conceyu, nel sentíu de qu’atopa les mesmes trabes pa llevar alantre’l llabor. Como claru exemplu, el Plan de Normalización Llingüística del Principáu nun se cumplió, lo mesmo que la Llei d’usu. La segunda teoría retruca a la primera y afirma qu’ensin oficialidá nun hai trabayu de normalización posible. Miranda nun ta tampoco d’alcuerdu con esta afirmación. Agora hai nueve servicios de normalización nos Conceyos y sí se consiguió faer planificación, salióse d’un primer momentu nel que nun taba mui claro qué función teníen y dedicábense a xeres cuasi esclusives de traducción; yá nun se ven como un apéndiz de les conceyalíes de cultura, sinón qu’abarquen otres árees dientro de l’alministración del Conceyu. No que se refier a la coordinación, la ponente calificó d’engañu que’l Principáu creare la figura d’una Rede de los servicios de normalización pa recular darréu al temer qu’eso s’organizare y se consolidare. Valoró’l llabor de los servicios de normalización como’l de L.lena, onde se ta intentando abrir un camín, y comparó los servicios de los Conceyos con islles que’l Principáu mantién a raya. Tamién consideró a los servicios como centros pilotu, como exemplos de lo que podría pasar si l’asturianu fore oficial y nesi sen certifica que la xente ta preparao, en L.lena naide ve estrañu l’usu del asturianu, nin hai nengún tipu de rocea.

Xurde Blanco presentóse como componente del Aconceyamientu de Xuristes pol Asturianu, que tien mediu centenar de socios de magar se fundó, va añu y mediu. Esplicó que’l so casu, el pleitu porque l’alministración del Principáu nun reconoz que pueda pidí-y n’asturianu permisu llaboral pa una operación, nun ye una llucha personal sinón que forma parte d’una estratexa coleutiva. Paez-y a Blanco que lo principal ye tener claros los oxetivos. Plantegóse’l ponente inclusive’l conceptu d’oficialidá, entrugóse qué ye lo que significa esi conceptu, que consideró cuasi una metáfora, pues en realidá tamos tratando de drechos llingüísticos básicos, el noyu del asuntu ye qu’hai un incumplimientu de normes fundamentales. Siguiendo col custionamientu del conceptu afirmó que nel Estáu español la oficialidá vese de distinta manera que n’Europa, mentanto nel primeru nun se-y reconoz nin siquier esistencia a una llingua si nun ye oficial, na segunda toles llingües rexonales tienen reconocencia, sían o non oficiales. Aclaró qu’usaba’l términu de llingües rexonales, magar se considera nacionalista, porque esi ye’l términu xurídicu usáu n’Europa. Siguiendo col análisis del conceptu aclaró qu’en realidá nun hai una definición xurídica d’oficialidá, solo nuna sentencia del Tribunal Supremu se recueye que podría considerase tala al emplegu polos poderes públicos d’una determinada llingua pa rellacionase ente ellos o colos ciudadanos. En cuantes a la realidá d’Asturies criticó duramente la estructura de l’alministración autonómica, que noma a persones de confianza pa puestos que deberíen tar dientro del escalafón funcionarial y prescindiendo de les recomendaciones xudiciales qu’aconseyen nun considerar como puestos de designación política a tolos que tán perbaxo del nivel de direición xeneral. Nesta alministración clientelar la esistencia d’un puestu de xefe de serviciu, o inclusive si fore de direición xeneral, dedicáu al asturianu ye irrelevante dafechu. Respeuto al Plan de Normalización Llingüística aprobáu pol Principáu paez-y de nula validez, yá qu’incluso hai una sentencia que diz que nun se traduz en norma xurídica dala. Nesti sen insiste en que nun se trata de que nengún altu cargu políticu fale n’asturianu, sinón de que se respeten los sos drechos de falante. Esplicó que l’asociación de xuristes de la que forma parte tien un procesu en marcha énte Europa; amás d’un pleitu énte’l Tribunal Constitucional, aceleráu pola inquina d’un xuez y p’allegría suya; y una apellación al Tribunal Superior de Xusticia d’Asturies. Solliñó que nun se cumple l’artículu 3 de la Constitución española, qu’en cualquiera de les sos llectures o interpretaciones lleva a la obligación d’oficialidá de la llingua asturiana: el “sedrán” de tal artículu tien un mandatu imperativu, y remitióse tamién a la voluntá del llexislador qu’escoyó esi verbu en vez d’otres propuestes que se plantegaron y que recueye’l diariu de sesiones.

Delles intervenciones del públicu abrieron el debate de si realmente la dignificación de la llingua asturiana ta dando pasos, de si les reivindicaciones, la reclamación xurídica o l’alternativa política son les víes transitables hacia la oficialidá.

Asturianu: oficialidá.

2007-11-07T14:09:00.000+01:00

El Grupu d'Opinión Algamar entama una mesa redonda y un coloquiu al rodiu de la oficialidá de la llingua asturiana.

L'alcuentru habrá de facese nel salon d'actos de la casa la cultura de La Pola Siero, el martes 13 de payares a les 19:30 hores.

Intervendrán:

Beatriz Redondo Viado. Escritora y directora del selmanariu “Les Noticies”.
Xurde Blanco Puente. Xurista. Lletráu del Serviciu Xurídicu del Principáu d’Asturies.
Penélope Miranda Fernández. Filóloga. Téunica en normalización llingüística nel conceyu de L.lena.
David Rivas Infante. Economista. Profesor d’ Estructura Económica na Universidá Autónoma de Madrid. Académicu de la Llingua.

Prestariamos poder contar con la to presencia. Con esi enfotu trabayamos. Gracies.

Algamar Asturies.

24 de payares

2007-11-05T09:57:00.001+01:00

Sábadu 24 de payares a les 18:00 hores, na estación de la Renfe n'Uviéu.

Resume de la conferencia

2007-10-01T14:10:00.000+02:00

CONFERENCIA D’ALGAMAR

CONSTRUYENDO ASTURIES

URBANISMU Y ECOLOXÍA

Miércoles, 26 de setiembre, Casa la Cultura de La Pola

Trenta y picu persones acudieron a esti primer actu d’Algamar nel qu’intervinieron como ponentes Xuan Pedrayes Obaya y Carlos Lastra.

El primer ponente, Xuan Pedrayes Obaya, empecipió por asitiar el tema a tratar dientro del urbanismu sostenible (o patrióticu, pues fai referencia a la tierra de los antepasaos, qu’hemos dexar a los fíos), anque reconoció que, como arquiteutu, tien qu’asumir que cualquier actividá humana ye incompatible cola naturaleza. Analizó la situación urbanística d’Asturies en términos biolóxicos diagnosticando septicemia territorial, xigantismu de la conurbación central y anorexa mortal de l’aldea interior. Fixo dempués un análisis hestóricu del poblamientu, organizáu siempre en mestes xeográfiques: la primera dómina abarcaría dende’l sieglu XII, sobrevive hasta agora y ye la que produxo la organización parroquial; la segunda mesta ñaz na segunda metada del XIX, básase na minería y siderurxa, ye más esplosiva y entra en crisis más rápido; la tercera mutación inaugúrase al tiempu que los banzaos, porque ello supón controlar l’agua, y vien definida polos strips, les autopistes. Cambia entós la perspectiva de les coses y de los edificios a 120 km per hora. El problema ye la macrocefalia d’esa aglomeración de 800.000 habitantes; hai una conceición anticuada de ciudá-rexón, onde lo bono sedría lo urbano y lo malo lo rural. Frente a ello Xuan Pedrayes propón un modelu con varios focos, una conurbación y un urbanismu que nun s’esparrame (en Roma hai menos grúes qu’en La Pola); pue densificase con coherencia y con imaxe agradable, dir a una ciudá modal. En cuantes a l’aldea usó términos d’antropólogos mexicanos, que falen d’intracolonialismu urbanu de l’aldea y d’endofaxa; y punxo como exemplu a siguir el de los indios semínoles, que mercaron el Hard Rock Café, son 3300, tienen una rede de 125 restoranes, 4 casinos, hoteles, sales de conciertu… y en 2005 repartieron 64000 € de beneficiu por persona. El secretu ye tener una base xurídica que permita una bona xestión de los recursos pa crear bayura. N’Asturies nun hai un verdaderu estatutu parroquial que permita una progresiva implantación de riqueza na aldea; habría posibilidaes enforma: la xestión parroquial de montes; de los terrenos onde hai parques eólicos; de la producción y comercialización agraria; del turismu… Con un marcu llegal favoratible, una cesión de competencies y la xestión cooperativa l’aldea podría tomar decisiones por sí y poner en marcha soluciones estructurales.

Carlos Lastra centró la so intervención en denunciar los escesos de l’alministración del Principáu, pa ello fixo referencia a testos y semeyes de la revista Asturnatura, qu’edita l’asociación d’Amigos de la Naturaleza d’Asturies y que tuvieron a disposición del públicu asistente. Empecipió enllazando cola observación de Xuan Pedrayes de que dende l’añu 70 p’acá hai hcia’l triple d’edificación n’Asturies con una población mui asemeyada. La so esixencia énte esto ta clara: hai qu’aparar de medrar, hai más viviendes de les que se necesiten y el camín habría ser el de reconstruyir y recuperar patrimoniu, non construyir de manera descomanada. La segunda esixencia ye caltener el paisaxe pa esfrute de tol mundiu. Respeuto a esto punxo la imaxe de la xente que tien qu’emigrar d’Asturies y a la vuelta nun identifica’l llugar de ñacencia, colo que s’acaba de rematar el so esllarigamientu. Centrándose en custiones concretes analizó con ciertu detenimientu’l casu de l’autovía de La Espina a Ponferrada y les alegaciones qu’ANA presentó pa salvaguardar espacios de gran interés natural y pa la conservación d’hábitat d’osu y gallu montés. Frente a la obsesión pola construcción y les grandes infraestructures de l’actual Conseyería, Carlos Lastra faló de que nun s’apueta por alternatives como’l ferrocarril o les autovíes del mar, que se planifiquen n’otros llugares d’Europa. Frente a ello n’Asturies el Muselón nun ta pensáu nesi sen y n’Uviéu, el famosu cinturón de fierro desmantelóse non pa convertilu en cinturón verde sinón pa enllenalu de cementu. Habría tamién qu’ameyorar la rede de carreteres y calteneles en bon estáu, punxo como exemplu Inglaterra, onde hai una gran autopista que vertebra’l país de sur a norte y el restu son pequeñes carreterines ensin arcén siquiera. Dende ANA tamién se propunxo crear víes verdes, la primera podría ser la carretera que va de Veiga Rengos a la raya con Lleón. Otru asuntu tratáu foi’l de les mines a cielu abiertu, comentó la marcha de Narcea Gold Mines pola baxa rentabilidá, pero cómo agora vuelve otra empresa canadiense, que pretende usar les instalaciones pa tratar mineral que vien d’otros llugares, cuando’l permisu de tratamientu dau a Narcea Gold Mines taba xuníu a una actividá estractiva. Denunció les dos balses de cianuru y el vertíu a El Ríu Narcea d’arsénicu y antimoniu, mui perriba de los niveles consentíos. Mencionó tamién otros casos, dellos con reclamaciones de vecinos pente medies: la nueva ampliación de la mina de carbón a cielu abiertu en Zarréu, la descatalogación de montes d’utilidá pública con oxetivos especulativos en Llanes, la falta de control de caza nuna zona protexida de Castropol, la política forestal que dexa faer y permite que s’enllenen los montes d’ocalitos, el proyeutu de banzáu de Caliao, con una acampada anunciada pa la cabera fin de selmana de setiembre, etc.

Varies entrugues del públicu y un pequeñu diálogu zarraron l’actu.

Primer actu públicu

2007-09-20T14:03:00.000+02:00

El tema ecolóxicu y del desarrollu urbanísticu ye un asuntu de gran importancia y actualidá. N’Algamar esmolezmos la falta de planificación racional del tipu d’Asturies que pretendemos construyir. Precisamos un modelu territorial equilibráu qu’integre les ales y la zona rural nun desarrollu sostenible que nun marafundie los recursos naturales, que nun vienda la costa o’l campu asturianu a los intereses especulativos del capital. L’urbanismu tien que dar respuesta real a la demanda de vivienda, y los poderes públicos tienen que facilitar l’accesu a esti bien básicu. La importación de modelos tipu Marbella, la masificación turística, les grandes infraestructures (Caliao, Lada-Velilla…) nun atienden pal verdaderu desarrollu económicu d’Asturies nin busquen respuesta a les necesidaes coleutives, sinón que van tres del enriquecimientu y espoxigue de grandes grupos económicos y de poder.

Ecoloxía y urbanismu nun son términos incompatibles; necesitamos modelos conservacionistes y planes de desarrollu pa los pueblos que consigan una integración nel territoriu y qu’ameyoren les condiciones y la calidá de vida d’asturianos y asturianes.

Presentación d'Algamar na prensa dixital

2007-09-11T12:12:00.000+02:00

El Comercio
Les Noticies
AsturNews
Asturies.com

Qué queremos Algamar

2007-09-11T02:32:00.000+02:00

ALGAMAR

Grupu d’opinión

Somos un grupu persones de Siero y otros conceyos de la redolada que quieren avanzar nel so compromisu con Asturies. Nel nuesu país hai grupos políticos, asociaciones cíviques y culturales, sindicatos... nos que dalgunos y dalgunes de nós militamos; el papel del grupu d’opinión ALGAMAR nun ye suplantar o rivalizar con nenguna d’estes organizaciones. Nun se trata d’un grupu más que pretenda entrar na competencia pola representatividá social y política. Lo que mos llevó a axuntamos ye la necesidá d’un foru común de formación, debate y creación de propuestes dende un puntu vista asturianu. Paecíamos que la unidá yera posible y la unidá ta siendo posible. Escomencipiamos esti camín sumándomos al trabayu de les más de doscientes organizaciones que formen el Conceyu Abiertu pola Oficialidá.

La nuesa propuesta asienta en cuatro pegollos fundamentales:

La reclamación de los drechos civiles, como ye la oficialidá. Paezmos que n’Asturies hai grandes deficiencies democrátiques nesti campu; una serie de drechos van de recul, nun s’algamaren o precisen d’una reivindicación permanente: a condiciones llaborales dignes, onde’l colectivu inmigrante y les muyeres acaparen les cifres de precariedá; a la participación política y social; a la llibertá de prensa; a la llibertá d’opinión y de crítica; al drechu a usar y adeprender la llingua asturiana (y el gallego-asturiano); a una educación laica, pública, de calidá y n’asturianu: a un mediu ambiente conserváu, pa beneficiu de la tierra y la xente que la habitamos y non pa mercadexar; a una sanidá pública y de calidá; a unos servicios públicos bien xestionaos; a la equidá ente muyeres y homes; a la equiparación de drechos de les persones inmigrantes; los drechos de gays, lesbianes y transexuales... Con polítiques efectives y radicales, nel sentíu de dir al raigañu del problema. Somos persones, nun somos súbditos; ser consumidores nun mos define, despersonalízamos. Los nuesos drechos civiles son lo mesmo individuales que colectivos; somos persones viviendo en sociedá y formamos un pueblu; la nuesa condición d’asturianos y asturianes tamién xenera drechos.

La reivindicación identitaria y cultural. Ésta ye otra demanda más como asturianos y asturianes conscientes; pero equí nun se trata solo d’un llabor de recuperación sinón d’integración de los elementos que conformen la cultura asturiana dientro d’un contestu que-yos dea sentíu. Interpretaciones descontestualizaes, ayenes o ridiculizantes puen desarmar valores identitarios de gran interés. Nós queremos siguir siendo asturianos y asturianes nel sieglu XXI y pa eso paezmos fundamental el respetu, la potenciación y l’actualización d’aquellos elementos que mos definen. La cultura popular asturiana nun ye folclorismu pa risión, ye un preséu más na voluntá de siguir organizándomos como pueblu.

El modelu de desarrollu, la llucha pol desenvolvimientu sustentable y un urbanismu que respuenda a les necesidaes de les persones. Son temes que mos muelen enforma. L’esfarrapamientu de los valores naturales d’Asturies paezmos un procesu que ta camín de convertise n’irreversible y que, cola sida del crecimientu económicu, lleva n’ocasiones a marafundiar recursos, a que s’especule y s’atienda más pal enriquecimientu individual que pa los intereses colectivos. Necesitamos proyectos económicos que defendan los intereses de la xente, mirando poles empreses públiques, polos autónomos, pol cooperativismu… y non ocurrencies milagroses o infraestructures descomanaes que namás defenden l’interés de los grupos de poder. Ye fundamental una ordenación territorial equilibrada, na que’l campu y el mundiu rural recupere’l pesu importante qu’hestóricamente tevo na articulación del país; pue haber modelos autóctonos que valan pal sieglu XXI, y pue haber sitios onde se mirar, por supuesto non en países culturalmente ayenos a Asturies o n’onde los activos del campu se marafundien pa que delles grandes empreses saquen beneficios rápidos. Hai que reclamar la naturaleza asturiana como un valor y non como una mercancía en manes del capital. Hemos evitar convertimos nun país colonizáu y dependiente, basáu nel monocultivu enerxéticu y turísticu, con una población avieyao y una mocedá obligada a emigrar. El futuru d’Asturies nun pue quedar hipotecáu poles prexubilaciones, que lo único que busquen ye la paz social empara d’un futuru económicu viable p’Asturies.

El drechu del pueblu asturianu a gobernase y a decidir cuál ye’l so destín. El procesu autonómicu asturianu frustró les espectatives de tar al nivel de les comunidaes con un nivel curiosu de competencies. L’estatutu que ta en vigor ñació en 1981 de los pautos PSOE-AP y nun siguió la vía normal pensada pa les comunidaes llamaes hestóriques, sinón les previsiones constitucionales españoles de la vía lenta (artículu 143 de la Constitución española), nun se refrendó pol pueblu y reformóse en trés ocasiones, siempre con una visión curtia de les necesidaes d’Asturies; enxamás s’apostó por un gobiernu que reclamare en serio la capacidá de xestionar el país, siempre s’anduvo a remolque de les comenencies del Estáu o de los partíos mayoritarios. Cola actual reforma tamos viviendo ún de los momentos más importantes de la hestoria recién pal futuru d’Asturies. Lo que pa nós fai falta agora ye un estatutu d’autonomía con unos drechos que nun se queden en nominalismos y debates vacíos, que nun respuenden a les necesidaes del país. Asturies tien que dexar de ser una comunidá autónoma de tercera pa llegar al mayor nivel competencial; nun podemos perder otra oportunidá más de ser protagonistes decisorios de la nuesa hestoria.

El grupu d’opinión ALGAMAR ñaz en Siero y la nuesa intención ye convocar a xente d’esti conceyu y los de la so rodiada. Paezmos qu’ello va facilitar el contactu personal, simplificar el trabayu del grupu, concretar l’espaciu pa delles de les nueses iniciatives y propuestes y aumentar la nuesa incidencia y operatividá. Paezmos qu’ésta sí ye una esperiencia que tamos adeprendiendo, pero na que queda tovía muncho qu’andar: el nuesu discursu tien que ñacer de les moliciones y los problemes concretos de la xente de los conceyos y llugares d’Asturies, un discursu de nós y pa nós.

Trátase entós de construyir enriba esos pegollos, llevantar un discursu asturianu que llegue a la xente pa dir asina faciendo país. Les nueses reivindicaciones namás van poder tener trescendencia social si se ven idees, crítiques y propuestes realistes, imaxinatives, honestes y comprometíes. Pa ello’l nuesu grupu tien dos xeres per delantre.

Una ye la formación y el debate de la xente que-y preocupa’l futuru d’Asturies y quier buscar soluciones. Delles veces hai una desconocencia tala de les idees y reivindicaciones fundamentales que poco más que les pegatines s’usen como patrimoniu ideolóxicu. Faen falta munchos discutinios, intercambios d’idees y análisis.

La otra ye l’actividá social. La formación y el debate de poco diben valir si nun somos a llegar a la sociedá. Tenemos qu’esparder les nueses reivindicaciones; trabayar col movimientu asociativu y cola xente, presentar propuestes y mociones... Ensin sectarismos y ensin consideramos la vanguardia que tien la verdá absoluta que va salvar a Asturies.